WELCOME 2011

我的新年願望和新一年的大計?!
哈哈...希望工作順利(唔好迫我再轉工!!)。大計...我有.....旅行大計(雖然得短短五日!)。

祝大家新一年開開心心,快快樂樂,甜甜蜜蜜。

尋找SOFA & 茶几 @ IKEA

放假無節目，最好做咩?!行IKEA囉。

MAGEBOX的IKEA有兩層3&4樓，由行入去開始就好似進入左夢幻世界,一個個完美的客廳、廚房、睡房隨意參觀，你可以暫時忘你的特式戶(特別細果種)，去享受百幾二百呎的客廳，仲要無雜物；個衣櫃大到你會覺得"衣櫃內的男人"其實唔係咁慘。WAKAKA...
我咁講唔係代表我唔鍾意行IKEA，反而我係無野買都會去行下。好似D人鍾意去迪迪尼一樣，逃避下現實，RECHARGE完又再打拚過。

而今次我們是有目標而去 ~~ SOFA和茶几。

SOFA - ST和我的要求都頗一致，唔可以太軟；偏向選擇布料，不過皮都可以；SOFA係要黎訓多過坐的地方。而我每次去IKEA最開心莫過於試坐SOFA，一張坐完又一張。總覺琳瑯滿目，但又好似張張差不多。
而今次除了坐仲要做筆記，一個個型號顏色抄底。發現原來我們揀黎揀去都係得其中兩張，只係唔同顏色。等睇埋其他地方就好搞定。

KIVIK 

KARLSTAD

茶几 - 好簡單，因為之前已經睇中一張長橢圓形櫸木的，今次都只係RE-VISIT睇下仲鐘唔鐘意或者會唔會遇上更好的。結果:還是覺得'你'最好，下次應該可以'BOB'槌。

STOCKHOLM

ROAD SIGN OF OUR WEDDING

搞結婚的初期，睇見其他BLOGGER的DIY手作，真係「驚為天人」，又靚又有心思。我心中團火即刻被揵著左。
指示路牌係其中一樣我好想係草地行禮時會出現的DETAILS位。(我連位置都諗好左。)

跟住問題出現左，邊度搵木牌?尋常屋企唔會有塊無用(靚靚)的木板，唔通要用房門'界'塊出黎?!如果係咁，恐防封塵廿幾年的滕條豬肉應該會再現江湖。WAKAKA...
紙皮、咭紙、黑板仔都好似無木咁靚。所以都係諗諗先啦...(又開始無左件事)

之後有一次跟ST係潮流特區遊蕩，見到D賣木制品的鋪頭，即係那種十幾年前一片大樹葉'界'開十幾廿塊，每個同學一塊做匙扣。現在人和扣都唔知去左邊，但是鋪頭好似不死，仲好似開多左，一個商場已經有兩三間。
即管入去望望，又幾靚喎，由以前單色到現在色彩斑爛仲有立體Q版豬仔狗仔的裝飾，望到又真係幾多開心嫁。

結婚用的大致上有三個圖案，我地都唔洗諗啦，就用藍天加草地，跟住再係鋪頭裡左摷右拚，要A加B減c，再加D減D。SALES姐姐講都無問題。所以我地研究左一陣就落訂。
因為我地唔趕用，所以SALES姐姐提議三個月後先起貨，當然無問題啦，方便到人又唔阻自己(姐姐，最緊要係畫得我靚D呀...OHOHOH)。慢慢我地已經無左件事。直至十二月頭SALES姐姐打黎話有得拎。

大家認住佢啦!如果有日路過九龍城，見到佢就好跟住行啦!

Pre-wedding Shooting with Bridemaids & Groomsmen {Ly Production} - 收相

其實D相已經收左成個月，一直無POST出黎的原因...有百個以上...黎掩飾我賴...HAHA..

這個PACKING我好鍾意呀。大約有三百幾張相，一如所料姊妹的相唔係太多(箇中原因可以追溯Pre-wedding Shooting with Bridemaids & Groomsmen {Ly Production})。坦白講論攝影功力未必最好，講後期制作好似無咁(因為ST的大肚仍然清晰可見，我無變到瓜子口面火柴手臂)。不過就"玩味十足"，大家的笑容都如實地反映係每張相裡面。

P.S. 仲等緊三張合成相。希望快D有啦。跟住又係揀張造相簿的時候。

五十二週的工作 之 課程四 ~ 長痛不如短痛

四個星期前，舊同事的公司請人，問我有無介紹。 有...我囉。

 

了解左佢地請人的要求和工作環境(特別係收工時間)之後，諗左幾日又跟ST商量過，覺得長痛(朝朝準時返工，但就唔知幾時收工)不如短痛(肉痛，要賠錢走人)，反正試下都無損失呀。

 

所以上個月著手準備見工的事，再加埋OT O到暈，所以除左俾人吹揀相外，籌備婚禮的工作完全停左。但是另一邊，有同期舉行婚禮的BLOGGER提到仲有三四個月已經開始擔心，又話有好多野未搞，不過睇左佢地的PROGRESS之後，發覺我仲野未搞呀!! >.<

 

今日收到個好消息...我可以遞信啦! WAKAKA.....SO MY DREAM WEDDING, I AM BACK. 

 

倒數....4星期

Pre-wedding Shooting {The Studio} - 有相睇啦

星期六去左THE STUDIO睇相，一拎D相出黎，第一個反應係"嘩...咁多!" 加起黎有四五吋厚。今次除左睇相，ST和我的任務係揀相做相簿、油畫、小相架和易拉架。

首先張D相按地點、場景分類，跟住隱痛將D相剔走。滴噠...滴噠...糾纏左三個幾鍾，重覆投票三、四輪之後，我地仍然未達標，比相簿需要的多左十幾張，又未揀到最想做油畫的相。但係我地就已經...一個'PAT'左係SOFA度，另一個就去左玩其他野，嚇到路過的MOON問"你地仲OK嗎?" 哈哈... 失禮晒，十足兩個讀讀下書，走左去訓或者玩的小學生。

最後，因禍得由福，因為有個LOCAION的相無左(可能係傳送FILE時遺漏左)，所以要遲D先有得睇，我們即刻"借D二"話下次等埋先再揀啦!! 哈哈...

ANYWAY，今次輯相都幾好，有幾張都有D驚喜。可能自己第一次影啦，有時都覺得自己笑得唔多自然，吸取左經驗，希望BIG DAY果日可以再"靚"D。嘻...嘻...

之前提過影相當日，有位不速之客的出現引起左一場"混亂"，今日丹終於有証據POST佢出黎啦。ST和我都會記住你嫁!多謝你帶俾我地一個特別的回憶!! ^_^

擺?唔擺!...唔擺又擺!! (III)

上次提到，通書話：註冊的日子唔好。咁點算？！

女長老當然想我改期啦。
我當然唔想改，預約好的場地、食物、佈置、律師、攝影攝錄、化妝 bal...bal...每一件都係ＳＴ和我用心計劃和建立，一句推倒晒太可惜啦！
男長老就表態「都已經訂好，就百無禁忌啦。」
二比一，講唔過就開始想拉攏ＳＴ的長老。（好！約下見面啦。唉...難道第一次就有火藥味！？）

之後我選擇的策略係「長時抗戰時間」，作不定期回報「好難改...」「好忙無時間改...」「最近公司好忙呀...」
妹妹就加鹽、妹夫加醋「咁米好多野要改...」「訂好晒，咁點算...」
男長老都係果句「日子無所謂啦，搞得開開心心先緊要...」

而ST跟我亦不斷商討各種可行性。另外仲要商量對外（取消BOOKING的同時，減少捐失。）和對內（都講左唔再只係兩個股大勢力，而係四個大的加兩個細。ST的長老仲未知，要改都要有個合理的交代，好等我家兩老好落台。又不時諗有咩POINT，可以說服我家長老。）可能要面對的問題。
不過日子，一日一日過，都要定個死線，因為取消都早Ｄ同人講一聲，等人接過第二個ＪＯＢ。

接近放棄的時間，跟阿K（中學同學）吐苦水，佢問「有無嬲過你媽？」
好坦白「無」可能因為一直相處都係咁，佢會用佢覺得好的方式照顧我，雖然有時候我唔多受，回番兩句，不過過兩日又無事。而ST都好坦白地話有Ｄ嬲，不過又唔想我做夾心人。
最後阿Ｋ話「你好維護你媽」。
叮！叮！叮！「係喎！我只係諗住媽，無諗過ST的感受。」突然問自己「係唔係都應該為ST和我夢想的婚禮堅持一下啦！」就作最後努力吧！！

儲左一晚的能量，剛剛放底飯碗，就豁出去「ST長老已經通知左外國的親戚，可唔可以唔改？」等左一等，準備繼續我十分鍾的理由。
「好啦！無辦法，百無禁啦！」長老平靜地話。我呆左，真係呆左（吓？！咁順灘？發生左咩事呢？）。
雖然長老最後都加左句「你諗下啦，改到就最好。」（N!...O! NO!唔改。）

這次順利的結果，雖然好開心，不過未敢掉以輕心。一個星期之後，再＂唔覺意＂提多次Ｄ人打黎問我地個期的問題，留意到都無反悔的意思，先鬆一口氣。

ＹＥＡＨ！革命成功！！

尋找吸塵機(下)

去左SOGO逛家品，因為簽匯豐咭有回贈。無意中見到ST的心水吸塵機，一個箭步衝埋去。又真係機仔細細，吸力又夠，外型都幾討好，按一下拉一拉就可以伸長吸管，唔洗續段駁長。

為有安慰自己「貴買平用」呀麻。(希望ST會自動自覺用先好!!)

跟我隻鞋的SIZE差唔多!! ^^

電郵

為左響應環保，新居的水費、電費、煤氣費、管理費、差餉、 都會盡用e帳單。用e帳單就要有個電郵地址，為了方便去管理，又要保留私人空間。所以要開一個新的電郵戶口。 而問題就出現啦，改咩"網名"好啦?! stag???@gmail.com

試左N個，都話戶口名稱己有登記， 最後連SERVER都拒絕我地再試，都未改到想要的。灰灰地， 我提議加埋數字算啦。不過ST就輕輕地話唔緊要啦，再慢慢諗下。(之後佢又真係有諗，又唔係敷衍我喎。)

靜靜講俾大家知，就是ST的這種執著和正能量吸引我，好 CHARM，好溫柔嫁! ^^

尋找吸塵機(上)

收鎖匙之後的第一件想做的事，唔係睇下間屋， 而係搵清潔用具用品。(哈!哈!我諗咁都唔算有潔癖卦。)

本來打算跟ST講搬屋企的吸塵機過新屋用住先，點知佢問我

「記唔記上次見的一部吸塵機?」 (上次係倍朋友去睇SCANNER，順路搞事。睇左咩!? 我唔記得。)
「你想買果部?」
「品牌一樣，不過另一個MODEL。」 (嗯...!睇黎有做功課喎。)
「咁邊度有得睇下。」
「旺角百xx囉!搵日去睇下...」慢不經心地。(我開始覺得. ..)「不過呢，一部成三四千蚊。」(啊...!明啦!明晒!)
「好呀!搵日去睇下。」(無謂咁快打洗沉佢啦，睇下又唔洗錢嫁! !)

其實ST一向都對家品電器有一定的要求， 而且通常都超越左我的要求(一千蚊，吸到塵米得囉。)。 所以我都上網做左少少功課先，睇下介紹和COMMENT先。

DYSON 吸塵機 DC26，又好似幾好喎!!

新居

這張相代表住ST和我黎緊會努力建立和維繫的家。

綠色:恬靜安寧又不失生氣，係我們共同喜歡的顏色之一。
很幸運地這些都是隨樓附送。呵!呵!呵!(免了不少麻煩。)

跟住的工作就係要找家具啦!!

五十二週的工作 之 課程三 ~ 做個成功的追數妹

工作上有好多大大小小的PROJECT， 每一個進度或時間表都不一樣，有時少不免會遺漏， 發現的時候就變成問題。所以上司指派我做"追數妹"。

 

對住D叫極都唔交功課的同事，可以迫佢(通知埋佢老細)， 可以鬧佢(大聲D等其他同事都知)，可以煩佢(每日一e貓， 半日一電話)，可以哦佢(講耶穌)，可以同情佢( 同佢一齊地鬧老細痴線，不過~~都要交!!)

但是被追數的對象係你直屬上司的話(即係叫你去收數的生物)， 咁又可以點呢?

通知我上司的上司(報串?!)，大聲鬧上司(博炒?!)， 每個鍾提佢一次(咁米提醒佢我的存在，唔得!!)， 同上司講道理(WORK咖咩?!)，同情佢(唔值囉， 邊個同情我呀?!)

 

迫於無奈，今朝一早好，就好有禮物地提起有樣野等緊佢的回覆， 上司就同我講:「咁做就'對'啦，追我交野就得咖啦!」 ~~~ 真係咀晒咀。心諗:「厚顏無耻，要唔要講句多謝你的讚賞呀!」 @_@"

倒數48星期

我們的特式戶

現在流行什麼什麼特式戶，細讚詳情後的反應都是"啊... 原來如此..."或者啼笑皆非。

而ST和我好順利地搵到我們的特式戶...特別細...哈哈!! 我地都認為~~屋雖然細左D，不過合乎我們的BUDGET， 而且周圍環境都幾舒服。只係辛苦左ST要由九龍人做左新界人， 返工放工就遠左(不過玩就方便左， 因為變左同D朋友仔住埋同一區)。

WEEKEND做左好多野，先搞住戶証，帶屋企人參觀、 作初步的打掃，仲有很多的"新發現"。

原來換門鎖或者大門都要問過管理處。

原來雪櫃後有個盆，拔左電後，冰箱的雪水是會儲在這個盆中， 要檢查一下和傾掉，以防發臭。

原來有一種泡狀的漂白劑去浴缸邊白膠上的黑霉積一流，塗上隔夜， 之後沖水唔洗刷，即刻白淨。

原來用STREAM機去磁磚之間的污積又係快靚正。 仲有強勁沙粉擦磁磚...真係可以搞到新的一樣!!

而最大的發現是屋企和朋友的勁大支援，各自搵晒屋企的資源出黎， 尤其清潔用品，實在慳番唔少,仲要送埋貨o添。 又不時收到好多溫馨提示，好窩心呢。

 

禮物

昨晚收到一份好有心思的禮物，真係好鐘意。

話說十月初跟兄弟姊妹團一齊影PRE-WEDDING， 大家都玩得不亦樂乎。攝影師SHIRLEY十分好人， 俾我地大機細機手機一齊影。

兄弟姐妹之一的犀利哥和犀利太，將這些BEHIND SCREEN PHOTO造左本相簿，送俾ST和我。真係好窩心呀!!

Cover

with Bridesmaids

with Groomsmen

Behind Screen

擺?唔擺!...唔擺又擺!! (II)

上次講到我家女長老又想擺酒，經過一個星期的反覆思量， 終於召開家庭會，三口六面講清楚，唔好話我無知詢過。

經過兩小時的商討，女長老總算作出讓步，唔再限制圍數。 而原先的程序"第一日出門/入門，跟住註冊(西式酒會+草地)。 另一日男家補擺酒"，改為"第一日註冊。另一日出門入門，夜晚擺酒"。

直到那一刻，以為可以完滿地解決啦!! 點知!長老望完通書話~~點解揀果日註冊嫁?!唔好喎.

晴天霹靂呀~~~ 唔好?!

五十二週的工作 之 課程二 ~ 反思

在舊日熟識的工作環境下，每日返工總是忙著周旋於上司、 客戶和同事之間，但就是無時間跟新同事說話， 因為佢地暫時還未有生產力，即係"投資價值唔高"啦(要多d時間去溝通先可以做到件事)。

最近對這種"忙碌"有著新的體會，因為隨著環境轉換位置逆轉了， 我成為"新同事"，對新的工作程序、範圍都好陌生。 偏偏遇著一個"好忙"的上司，就是連跟我說話的時間都無。
無指示、無方向，究竟我點樣可以將自己變得有生產力呢?! 有時都會不自覺地"玩手指"過日晨。玩到夠鐘就想收工， 但是只得自己一個準時放工，又是另一個爭扎。

原來幫助新同事融入工作環境是重要的一環， 今同事盡快對隊團主產生歸屬感都相當重要， 如果不是每日都會諗要不要繼續留底，定係趁早另謀高就。

倒數49星期

五十二週的工作 之 課題一 ~ 等

等是漫長的，由六點等到七點八，先收得工。

等是未知的，要等一個忙碌的同事完成手頭的工作， 再跟我閞一個PHONE CONF.幾時?無人知!

等是無奈的，要等到同事"提議"明天才開會吧!

倒數50星期

瘦身篇

要減肥的唔係我，係"身懷六甲"的ST。據當事人講，因為識左我之後太幸福的關係，心廣體胖，體重直線上升。咁都得？！... 既然係咁，「ＭＲ. 賴」我會負責任，迫你減嫁啦！！

只靠運動似乎唔多work，因為實在成日ＯＴ，好難減好多。只係節食又唔係咁好，此終要返工做野，挨住餓做野，又真係幾可憐咖！所以減左成年都KEEP得好好，唔升亦唔（多）跌。

後來見到廣告介紹一種代餐，每日一餐，一個月可以減５磅，生果味好似MIKE SHAKE（望落都幾吸引），又唔洗挨餓，所以同ＳＴ去間專門店睇下，買左兩盒，每人一盒試下（一盒七餐）。為表支持，我都倍佢一齊食，另一方面都想親身試下，先知有咩感覺，一包果汁加半包牛奶，真係夠飽？！

第一日（午餐）：牛奶多左Ｄ，有Ｄ稀身。桃汁加芒果肉，味道唔錯。有Ｄ食完等如無食的感覺，我諗主要係無熱食到肚。三點幾開始見餓，好彩有儲備，芝士夾心一包三片。

第二日（午餐）：跟指示牛奶少Ｄ，杰身左，好似係飽Ｄ喎。不過白提子汁加甘蘆薈肉，味道唔多討好。四點幾見餓，今日有準備，返工時買定個細提子麥包，飽Ｄ又無咁罪疚。

第三日（午餐）：朝早唔記得買牛奶，反正落街，不如食埋先返啦！！是日午餐焦糖咖啡伴半份三文冶。

第四日（午餐）：代餐。四點細提子麥包。

第五日（午餐）：同事話一齊食飯喎... 唔關我事嫁！！

第六、七日：是日休息。咩都放入口。

第八日（午餐）：唔多想飲奶... 最後咖啡加半份三文冶。

第九日（午餐）：... 返工唔就得買牛奶... 做野又有Ｄ辛苦，獎勵下自己，咖啡加一件分CHOCOLATE CAKE。

第十日（午餐）：唔記得左上星期盒奶未飲添，過期掉左！中午睇住份代餐凍冰冰，好想食熱野呀。唔知係多野做，定習慣左，下午唔再見餓。不過唔好浪費，放工前食埋個包先走。

第十Ｘ日。。。如是者，ＳＴ已經食晒七包代餐，我仲有三包。

P.S. 牛奶係全脂。咖啡會加CREAM。除左返工的午餐，其他餐（包括零食）都係平時的份量。

試完後，整體感覺OK，一致認為可以繼續食（最緊要ＳＴ肯食，仲要忍得口，連麥包都唔食，真係佩服。）。跟住再買多兩個月的份量，每人一個月。當然最後，我將大部份都俾左ＳＴ食，我繼續係食一餐停一餐的進度和唔戒口的情況下，個幾月先KILL晒Ｄ代餐。

結果係我輕左６磅，友朋見到我，都問係唔係瘦左，自己其實唔係太覺囉。ST就輕８磅，不過唔多覺瘦左係邊（可能成日見住啦），只係據聞皮帶可以扣入一格。

不過之後都無再買，一來一包代餐廿幾蚊唔係平，二來午飯時無得出去跟同事吹水。而最重要的係PRE-WEDDING已告一段落... BIG DAY又未到..嘻嘻!...嘻嘻!!

Laser篇

天生牛王頭，最鐘意通山走。中二那年的暑假日日去泳池， 曬到黑炭咁一樣都無有怕。但是隨著年月增長，雀斑色斑都增長了不少，但發覺時回頭已太難。

所以謄粗粗走左去試Laser(激光去斑)。第一次上去醫務所， 登記的職員俾左價目表我睇，又叫我搽定麻醉膏， 然後可以去食早餐，45分鐘再返去。(心諗激光咁大件事喎，點解無跟我詳細解釋嫁!?) 食食下份熱香餅開始覺得仁中發麻，D藥力都幾快。

返上去醫務所後，姑娘派左兩片化妝綿用黎洗面， 跟住就見醫生時做了個分析，
我臉上近鼻位深色少少的叫?斑，近權骨淺色少少大笪D的叫?斑。(已經唔記得左個名lu ^^")

講解完無問題就訓上張床，帶眼罩和浴帽就可以開始啦!(咁簡單嫁? !我好似未準備好喎)。蒙眼之後就只聽到Da..Da..Da..(都有D驚), 打係面上好似螞蟻咬。如果麻醉藥搽得唔夠就會痛D， 搽得多就完全無感覺。跟住再用另一部機重點打某位置， 每一下都會有紅光再加強勁的涼風（打到的位置會結焦或瘀紅， 頭幾打成面都係結焦的黑點都幾醜樣嫁，不過三日後焦就會自動脫落，跟住即時白晒，效果明顯。)， 整個過程唔洗5分鐘做完。跟住出去BOOK埋下次(兩個禮拜後) 就搞掂啦!!

我每次都BOOK星期六朝早，做完之後唔介意樣衰的話(有一D瘀紅， 好似嚴重的豆豆印咁)，基本上都可以照去街。 星期一返工就已經唔覺，只是兩邊面只係仲有少少紅。

SO FAR做左八次大部份斑都無(淡)左， 如果唔係吹毛求庛地哄埋塊鏡度，其實都唔係好覺。我諗緊留番兩次，等BIG DAY前先做埋佢。

擺?唔擺!...唔擺又擺!! (I)

從小就好清楚家中的權力核心和權責分配，想買零食玩具找男長老， 考試成績功課回報找女長老，身體出現毛病找女長老，要搗蛋搞亂要趁女長老不在家， 在男長老面前搞事只要係底線上絕少出手體罰，底線之底只出手一次，仲要唔多痛...嘻嘻... 所以女長老的穩握權力核心從無置疑。做決定時， 只要得到女長老的批准，基本上我就可以做野。

八個月前起這個不明文的控制權改變了，這令我有點不知所措。 從此(終身大事的)決策上我再唔係得一個大老細，而係四個。 相信大家都非常了解，身為小輩的難處，唔聽家中兩老話視為不考， 唔聽未來長老話視為不敬，你講死唔死!!

如果意見一致當然無事，但係家陣男家想擺，女家就唔想擺咁多， 如果唔係就唔擺。問你死未!!幾經商討，總算有個定案，註冊跟擺酒分開兩日， 只有男家擺酒宴客。之後我一直避免再談此事。 不過上星期我家大長老唔知抽起邊條根， 話得註冊連茶都無杯有點怪怪。吓...我真係O晒咀。
(~~ 待續 ~~)

Pre-wedding Shooting with Bridemaids &amp; Groomsmen {Ly Production}

又係一次好開心的經歷，雖然開始時有D阻滯(化妝師s遲大到)。ANYWAY, 多謝攝影師SHIRLEY & 一班工作人員，令到兄弟姊妹團、ST和我都玩得好開心，同時亦做到ST和我想要的野，就是一眾好友有個「集體回憶」。

當初無意中找到LY PRODUCTION的WEDSITE，其中一輯PRE-WEDDING相記下了新人的相識經過，沒有文字，只用影像表達，幾IMPRESS。約見SHIRLEY時，她介紹了PRE-WEDDING FOR GROUP(GROUP的意思除了新郎新娘還有一班兄弟姊妹)， 心裡即時'叮'一聲，因為輯相不再只係得兩個人和大家讚賞聲( 跟住攝係床底)，而變成'一村人'的回憶，於是膽粗粗試下。由於這類PRE-WEDDING的REFERENCE不多，兄弟 姊妹們都在一知半解下爽快地答應。(真係只講個信字， 實在俾我買豬仔都唔知...哈哈...講笑。 我又點捨得買左我班好姊妹呢。)

籌備了四個月，由零碎的意念到完整的骨幹， 再到各項細節，兄弟姊妹的服飾、時間的安排、跟攝影師開會、找化妝師、跟姊妹做BRIEFING和SHOPPING揀衫( ST就負責統籌兄弟幫)。當中要安排的事情比只是我們倆個的PRE-WEDDING還要多。

終於上星期六，下午一點半大家開始齊集在九龍灣的某工廠大廈的STUDIO， 先拍攝ST和兄弟幫，由於未WARMUP動作有點生硬。 跟住影打籃球場景，可能成村人睇住(成廿幾三人嫁!) 有些少緊張，眾兄弟未能發揮"平日的水準"，突然有人大叫" 個波好有問題喎!!" 哈哈...有人賴波硬。在場的人都即時起烘。

跟住輪到ST和我的二人照，攝影師照例要求SWEET點， 其實有左之前的外景的經驗，應該無難度， 但係當有十幾部相機對住的時候又係另一點事(除了攝影師， 兄弟姊妹的相機、iPHONE都出動了)， 就好似被一班記者追訪咁。嘻嘻...突然變左明星添!（就算有咁多部相機出現左，SHIRLEY都無黑面，任我地玩唔嬲，有時仲等一等先轉SETUP。而兄弟姊妹都好合作，盡量唔阻礙攝影師和工作人員。氣氛相當好玩。）

而過程中我最感激的係一班姊妹(當中包括兩位男士)， 由於兩位化妝師一齊遲大到，搞到姊妹們要等， 為左快，就算覺得個妝或者髮型有問題都草草收貨，自己再執， 兩位男士更是陪等。更甚係姊妹(相較)少左時間影相(好可惜呢!!)。不過'姊妹'們一句怨言都無，照影、照玩。而攝影師就話只要我地有時間， 原本計劃要影的SCREEN點都會影埋先收工(都算係咁啦!)。 不過就搞到兩位兄弟的太座係屋企煮好飯等埋老公先可以開飯。而化妝師臨走重夠膽派咭片俾我，你估我仲會搵你嗎!?

ANYWAY，ST好滿意覺得好好玩。而我經過今次"教訓"， 我會跟我BIG DAY的化妝師預先作好溝通，減少係CHANGING ROOM的時間，多點時間去跟我的賓客"玩"。

Pre-wedding Shooting {The Studio} - 影相日

二零一零年九月廿四日的天氣報告

有一兩陣雨
日間部分時間有陽光
氣溫介乎27至31度
吹和緩至清勁偏東風
************************************************************************

今日ST和我影左我地的第一次影婚紗相啦!! 天氣好好，有陽光，有藍天，有風。

我地揀左影studio(玩大字報)、coffee shop(賴休閒)、銅鑼灣(SOGO前，唔知會唔會上YouTube啦。係利園仲見到劉青雲夫婦，好高好恩愛呢)和赤柱(扮野餐、睇日落。同場加插貪玩的金毛'擔'走我地的大ELMO)。

總括我今日玩得好開心! 好想多謝 (排名不分先後)

Cocoon Vingi 的耐性和用心，仲有幫手改衫的師傅(係一位和藹又笑容滿面的女士)。 

Sales Moon 幫我地安排。

化妝師 家儀幫我化到隻眼仔大左成倍，幫我處理好晒我的衫，又快手。

攝影師 Jackson幫手餵蚊(所以無蚊咬我)，哈哈 ... (講笑)。好期待佢的相，因為ST對最後一張剛剛日落，天色還是深藍時，昏黃街燈下的相，讚不絕口呢。  

打燈的Calvin又要幫我執裙擺又要幫手拎野。

最後，多謝ST的合作，幫忙一齊準備了兩大袋的導具，又陪我試衫Fitting。

穿?唔穿...耳!

外婆穿左，媽媽無穿，妹妹穿左。好似搓迷咁...其實只係我心十五十六，唔知穿唔穿耳好。現時耳環的款式真係又靚又多，好吸引。不過我怕痛又怕煩，所以一直都帶一些夾的款式。至愛係日本的U型夾唔痛，像真度高，可以以假亂真，經常被誤會我穿左!嘻嘻! 不過此U型夾只可以承受輕身的耳環款式，係香港我只知道得兩個品牌會用此夾款，所以可以選擇的款式唔多。出街用尚可，配上婚紗晚裝就尚有所缺。所以又再次燃起穿耳的念頭!!

認真地上網找過一些資料參考，邊度穿好?怎樣護理?收費?...總括意見不一...收費由幾十至幾百不等。又問過過來人，不過對此印象相當含糊和求其...

終於有一次鼓起勇氣去旺角大型商場內一間朋友曾經穿耳的鋪頭(我當時還在場呢!)，入到去望一望價目表，嘩...之前唔係二、三百嗎，現在要五百?!最後咩都無講(問)走番出黎，站左係走廊度爭扎。好彩ST打黎問食飯未，如釋重負，即刻走人!! 哈哈... 真係無用啦! ^^"

經此一役，本來都打算放棄，但是柳暗花明，又俾我係百利一樓搵到一間用環型彈弓夾的耳環，此夾可以承受的重量多D，所以可以選擇一些比較誇張的款式。像真度都OK。初步的舒適度OK。而長時間配帶，會唔會痛就有待親身驗證。

 

Pre-wedding Shoes II

真係好事一不離二，二不離三。PRE-WEDDING FITTING前"意外地"買多左對PRE-WEDDING著的鞋，FITTING後又買多一對，荷包再度失守。

事原PRE-WEDDING有一PART想影D跳躍和CASUAL感覺的相。跟ST夾過各自要準備白色波鞋，而我近年總有對CONS看門口，當然選擇白色皮CONS啦! 著得番麻。不過最近市面上出現左一款類似CONS，不過PLATFORM要高一半的鞋款，價格一D都唔平，有D近千蚊一對，一直都不以為意(以我慳家的原則，高半吋姐，就要貴一倍，唔多化算)。

點知係SOGO經過臨時COUNTER時，俾幾隻字吸左埋去。"...暗藏四吋..."?!點睇都無呀，SALES姐姐見我咁疑惑，就拎起隻鞋解釋我知。嘩!個PLATFORM真係好高喎。哈哈... 咁又叫我點忍手呢!!

P.S. 原來係我孤陋寡聞，上網SEARCH番，係韓國出品，利園有專門店。

Pre-wedding Shoes I {Staccato}

凡亞比的影響，雨下不停。去COCOON Fitting 前見仲有時間，又唔想走出室外，維有係中環置地的鞋店逛下。係STACCATO見到對鞋又幾靚，又夠高，仲要做緊Sale，折實$499。要黎影PRE-WEDDING都幾型呀。終於係十萬個理由下，買左。HEHE...

Wedding Shoes {Sweet Poison}

一直以為找一對婚紗鞋並不困難，普普通通的一雙白色高跟鞋就可以了。款式、閃石通通都無所謂，反正都會俾裙擺遮住。只要求五百蚊以下，高度起碼3吋以上(無法啦!我沒有六呎高麻...HEHE。而且ST長得又比我高很多，足夠我放肆地增高。就讓我＂高高在上＂一天吧! 呵。呵。呵！)

每當走進鞋店，環視一圈，三吋白色，原來都不是易找。八成唔夠三吋，九成唔係白色。去一些專買婚紗鞋的鋪頭，又些鞋跟的線條不美。靚的又不便宜。

原來我一點都唔求其呢！^^"

結果...俾我係銅鑼灣的東角找到佢。好開心呀！

P.S. 那位SALES仲好好人又有耐性，俾我試完又諗，諗完又試。

欄門花球

話說有一次，老友出嫁前一晚，係佢屋企幫忙打點，其中欄門的繡球極之難搞，因為那個球只是用絲帶打結而成的半球，為了老友的婚禮可以"盡善盡美"，我用左大半個鐘又針線又釘書機，務求將半球會反地心吸力向上，哈哈... 結果...咁係唔得啦。掛起之後總係轉向地。唉... 從此之後，心裡一直暗暗唔知點算好，我BIG DAY的時候點搞好呢?!

有次無此意中睇到Gen's Blog講點做欄門的花球，成個人安樂晒，唔難造又靚。因為無熱溶槍又想慳番D，所以用左白膠槳和大頭針(針長D好D)來固定花頭。做過轉力測試都算PASS啦!! ^.^

Inviation Card for my Bridesmaids

好想親手做張獨一無二的CARD俾我親愛的姊妹團，來表達我的誠意和心意。

做落原來一D都唔難做，太約20-30分鐘就搞掂一張。

Pre-wedding Shooting {The Studio} - 功課篇

Join左個 package後，Moon就俾左六條問題作為功課，大約一個月的時間去準備，要ST和我各自回答，仲要描述得越詳細越好，籍此讓攝影師了解我們多點。

其實問題不過是，點識？對對方的感覺？而最考起我的問題是有咩地方係有特別意義或者想影，吓？！... 無喎。平時的節目不外是行街睇戲食飯。人多擠迫的節目，可免則免啦。浪漫的場景？我地經常的'籍口'都是輕輕鬆鬆，無plan地過一日，就是最好的planning。哈哈...問你死未？!

Anyway，總算交左功課。之後第一次開會時，攝影師Jackson要求我地再諗諗地點方面，另外Moon再三提醒輯相係我地的，希望ＳＴ和我再溝通多些，俾多些input。Hm.... 為有'認真'地再做一次。由地點studio、我們生活的城市、綠油油的草地、樹影婆梳的樹林小徑，到感覺舒服、跳動、快樂和親密，連當中想表達的意念和故事都記下來了。這個花了我們兩三個晚上才完成呢！

哈哈...好彩最後Jackson都收貨(仲鑽我地份功課呢！^Ｏ^)。第二次開會時，聽到Jackson講：係腦度已經有Ｄ畫面啦。個心即刻安樂晒，咁我地就交俾你啦！！

Pre-wedding Shooting {The Studio}

跟ST都有一個共識，PRE-WEDDING PHOTO是可有可無的ITEM，或者遲D補番順便當去旅行。不過思前想後，加上身邊的過來人的勸告，始終一生只會做一次(正常和好彩的話)，此經驗藉得回味。

大型的婚紗相連鎖店一早已被我倆摒諸門外，因為除了靚，我地要影自己的相，一樣的場景、一樣姿勢，都不合脾胃。於是在網上做資料搜集，找獨立的攝影師或公司。我負責第一輪的挑選，ST就作第二輪(好奇怪，佢看三四張就已經講得出佢鐘意或者唔鍾意張相的.......[下刪二百字]，而我對住D相就開始發呆，心諗好似同之前的都差唔多姐?! 不過算啦，反正全部都我覺得OK的範圍內。)

跟著的每個星期六、日就跟'入選'的攝影師見面，一如以往我的幻想與現實脫節、選擇困難症候群又發作，所以總是一拖再拖。

正當想放棄之際，我地撞左入去THE STUDIO，亦因SALES MOON的一句"係我地跟你想要的去影"，嘩...中晒啦。而MOON亦不嫌其煩地提醒，JOIN得就預左要做功課。難得ST無問題，就即場落訂囉。

Pre-wedding&#39;s Gown {Cocoon}

ST和我左上左COCOON試PRE-WEDDING的衫(目標2WG+1EG，因為男禮自備，ST只係睇無份試，佢差D訓著)。

本來我諗住個幾鐘就搞掂，點知一試就三個鍾(差不多試左十件WG、十件EG)。SERVE我的VINGI都仲好有耐性幫我，真係辛苦晒。點解咁失策!? 因為之前第一次上去睇的時候，MARK左嫁款有D都無左(無期或者已經無左)。所以如果又係PRE-WEDDING PACKAGE 包埋Cocoon衫的，上去前都係問清D衫仲有無係度，唔係的話揀唔到影PHOTO的衫，就要加錢去UPGRADE($800/件)。

最後試到我都無咩心機，揀左兩件(要加錢)，一件(唔洗加)。HM... 你話這千六蚊係唔係物有所值? 我就真係幾肉痛嫁，又無果種買到心頭好的快感囉。

諗番我一開始的策略就錯左，我應該試晒D影PHOTO的衫先，真係揀唔到先再睇UPGRADE的衫。而家我將兩類衫一齊試，好自然實OUT晒的影PHOTO的衫啦!!最後剩底的差不多全部要加，但係回頭又已太難。

總包今次的經驗，COCOON HIGH GRADE 的WG真係好靚，不過就係'天價'。而普通grade的款式尚可，不過手工同CUTTING(特別係胸部位置)，其實其他地方仲有好多選擇。

Food Tasting {Munch}

當落實註冊的場地係九龍仔公園後，跟ST就有共識會搞一個小型的西式酒會。草地、音樂、精緻小吃、至親最愛的祝賀，這個PROPOSAL，ST "一聽傾心"。

資料搜集的初期，知道MUNCH有提供到會，我自己之前同朋友聚會，已經試過佢地尖沙咀店的食物，都有Ｄ信心。就SEND 個EMAIL去問下。提供左地點、日期時間、大約人數。好快就收到ＭＥＮＵ和ＰＲＩＣＥＬＩＳＴ。價錢都合理，平過美Ｘ。有９款小食和５款甜點，１０磅結婚蛋糕（款式可以跟我俾的ＲＥＦ造），８款飲品，所有ＳＥＴＵＰ和人手都包左（大致上轉款、加減都可以，自由度都幾高）。佢地的ＳＡＬＥＳ　ＭＡＮＡＧＥＲ　ＪＯＥ都好ＮＩＣＥ好幫手。來來回回幾次ＥＭＡＩＬ和電話之後，大致上定左我想要的ＭＥＮＵ後。就約係佢地的餐廳試食。

試食的過程相當愉快，就好似自己食飯咁，ＪＯＥ只係開始和用膳完先出現，無ＳＡＬＥ過任何野。９款小食小次過上，排得相當精美（唔係聖誕公司叫到會一盆盆咁），賣相討好（加分）。試食開始，由左至右逐一試食，我負責記下大家的＂食評＂，ＳＴ就負責影相，食物味道大致可以，無驚喜又無驚嚇（ＰＡＳＳ）。經過一輪討論，我們想ＯＵＴ走其兩中款。

接著上甜點時，不得了啦！！其中三款一致激讚，

迷你美國青蘋果枇（熟蘋果的香和酸，ＳＴ唔多鍾意，我就愛死啦）（加加分）

迷你紅桑子ＭＯＵＳＳＥ杯　（帶少少甜酸，清清地）（加分）

迷你開心果法式朱古力ＣＡＫＥ（朱古力重唔太甜，我唔好朱古力ＣＡＫＥ都愛上了）（加加加分）

試完所有食物之後，ＪＯＥ聽完我地講ＯＵＴ走邊兩款小食同埋原因後，佢都可以就住我地的意思改用另一款。好似我地覺得全部小食都偏漏，想要Ｄ清清地，就提議轉青瓜杯（ＳＴ和我都覺得幾好）。而其他細節的問題都遂一商討，甚至我地要的數量比原來的少都無問題，寧願我地到時早一個星期前通知佢再加。

另外，我ＢＩＧ　ＤＡＹ之前會再約我地去個場睇一次，睇下點ＳＥＴＵＰ（ＳＥＲＶＩＣＥ　加分）。

OUR RING {A Diamond}

一直都無認真地睇過婚介,一來同ST講好左,婚後唔會帶(因為唔鐘意帶,所以一直都無帶介指的習慣),二來幾個大的品牌的廣告鋪天蓋地，唔洗親身睇都略知一二。

就是因為婚後唔會長帶,更加想為"佢地"留倩影，要影PRE-WEDDING 前準備好。所以"剔"地起心肝去搵我地的"THE ONE - RING"。好好彩今日一擊即中，事緣ST見他的同事的婚介幾靚，同事就介紹我地去百利睇下。鋪頭細細，款式都OK(都係果D啦 ^^)，好就好在咩都有得改,闊D窄D、厚D簿D。而我偏愛簿身，貼手的設計。之前係大店多算係厚身。而價錢OK啦，二、三千18K, 貴D改用鉑金又得。

老闆同老闆娘都好好人，都無話HARD SELL，好有耐性俾我地慢慢睇。睇左兩個鍾，其間有四、五PAIR人黎拎介指/試介指。D客好似好滿意咁，同老闆有傾有講。 有一PAIR刻完名再刻寫字，老闆都無黑面，只係講笑話"咩都俾你們刻晒啦!!"

而我地經過重覆又重覆挑選，最後THE ONE 居然係一款諗都無諗的款式，由簡單變成華麗(都幾極端咖)，就因為我本著咩都要試和ST骨子裡的愛閃基因!! 一試ST就返唔到轉頭，ST眼尾都唔再睇D"簡單婚介"啦!!

至於款式 .... HMMMM.... 睇住草圖先。制作需時二個月。

幻想與現實脫節、選擇困難症候群

為左搞人生大事，好不幸我被診斷患上「幻想與現實脫節的選擇困難症候群」
病徵:
   - 心煩、困擾、極度迷茫;
   - 無心機工作;
   - 不停諗野同計數(諗埋d唔等洗野);
   - 成日幻想會搵到平靚正的東西;
   - 沮喪因為樣樣都 out budget;
   - 經常諗如果A鋪的甲 + B鋪的乙 + C鋪的丙都只係D鋪的價錢就好啦。(仲唔係脫離現實!!)

唔明?! 即係想用十蛟買粒鑽石仲要嫌唔夠大粒。 哈哈哈....(苦笑)

不過好彩，被我發現左。為時未晚，因為仲有九半月要跟這「絕症」搏鬥。
知道了根源，希望有助我容易D控制「我的病情」。加油!!