35週 - 生病

除了影相，借機跟ST去了個小旅行，兩日一夜香港黃金海岸。。。哈哈 (仲要我地住在新界大西北!!因為有左BB，成年無得搭飛機去旅行，唯有自我安慰一番啦。)去得旅行當然要食「豪」D啦。晚餐去了附近廣場一間法國餐廳，食CANDLE DINNER，頭盤ST ORDER左半打生蠔，加送一隻，我見個買相都唔錯，所以我都破戒食左一隻大大的美國蠔。以往我只會望住ST食就算，不過放假o麻，一齊食高興D。咁就出事啦!

第二日回家到一齊如常。為獨晚上睡不安寧，每隔個幾小時就會醒，周身唔自在。輾轉到天光時份，甚至想嘔，最後唔再敢訓落床，坐左係SOFA度'中'眼訓。(聽見房中ST的鼻鼾聲，[魔鬼的我]真想打巴落去叫醒佢;[天使的我]叫醒佢都幫我唔到由佢訓啦)

亦都深深體會到其他媽媽整晚不停醒，訓完好似無訓的苦況。當時仲以為係大肚的身體不適，心諗唔係最後一個月，要咁過o麻，唔好呀!?

挨到七點鍾，要起身返工，越來越唔舒服，連手腳都酸軟無力。梳洗完畢，突然嘔左出黎，尋晚餐飯加黃膽水都一齊嘔晒。我仲天真地以為唔係最後一個月先黎「孕吐」o麻!?再諗真D，尋晚已經開始有少少肚瀉，不過因為最近有少少便秘，所以不以為意。又呵又嘔，應該係食錯野，過期(一日)鮮奶?雪糕?定係生蠔?(原來我兩日來都食左好多「違禁品」)

本來唔再食野住，不過個胃真係好唔舒服，粥煲緊，又仲有半個鍾先食得，唯有食朱古力餅頂肚，食完唔夠廿分鐘，又嘔過。今次大禍啦!點算呀?
唯有繼續灘係度等夠鍾去醫生啦。間中又拍下個肚，想BB俾D反應我，佢有陏個心都定D。

個胃仲係唔舒服，今次試食兩啖粥，等半個鍾，無再嘔。又食多少少，無嘔又開始無肚瀉，如是者分開食左幾次粥，後黎仲可以訓番落床添。下午三四點的時候，個人都開始精神番。食完，再訓，訓醒的時候已經晚上九點，人已經精神晒，BB仲識出拳和踢腳。^^ 好番晒!

反而輪到ST放工番到黎，成個人散晒，仲開始肚瀉。所以我地覺得應該係D生蠔出事!!

35週 - Maternity Photo Shooting

終於黎到影相的日子，天氣放晴，仲有少少熱添，啱晒我準備左的影相衫，一件雪舫ONE-PIECE、牛仔褲加黑色TUBE-TOP、仲有LACE一塊。
至於導具方面，準備兩件BB衫仔、兩對鞋仔、兩隻熊BEAR BEAR、同埋自制拉字「B。O。Y」。

今次我搵左全女班，攝影師、化妝到助手都係女仔。
由室內開始，先影一些SEXY的相，咁大個女第一次影，雖然都有D唔自然，不過都無咁尷尬，由其是LACE果PART係半裸上陣嘅 ^^"。
我諗ST都無準備我會影黎PART。一於先斬後奏，影完先跟ST講就算下次再影大肚相，都唔會係黎個STYLE，因為已經多左個小朋友啦，所以只有這一次機會!!
好彩攝影師IRENE CHIU都好好人，會教我點樣擺POST會影出黎靚D。

影完室內，再到室外。藍天白雲的OUTDOOR景，剛剛好的陽光和溫度，只有一個字~~正!!
可能係影大肚婆的關係，所有的節奏都係嘆慢版，跟之前影PRE-WEDDING或者BIG DAY比較下，舒服好多。當IRENE示意完成最後一個SHOT，助手笑說可以放飯啦，大家慢步回頭離開時，IRENE突然叫停大家說「這個景好，來一張」「那裡不錯，再來一張」，後來連她都說笑地話「平時只有客人'唔俾我走'我，今日我竟然換番轉頭。」哈哈，我反而欣賞這種工作態度，証明我無搵錯人。

特別嗚謝 - 化妝師JOJO，今次全天候照顧，很貼心。仲擔任埋臨時SNAPSHOT，拍埋一份。
 

34週 - 買包被

請左半日假去產檢，見完醫生仲有時間，就先去shopping 再食晏，跟住返工都未遲。

行經皇室堡，見有好多BB鋪頭，就上去睇。其中一間標榜ORGANIC，就入去睇下啦。摸上手質地又真係幾舒服喎。

最後睇中左張藍色包被，雖然貴少少($358)，不過最初幾個月都會成日用(自我催眠中)，應該都抵番嘅。

之後再上番佢的WEBSITE見到有D包裝成蛋糕的BABY GIFT都幾可愛，下次揀禮物俾朋友的BB可以多個選擇啦^^

34週 - 手疼又腳腫

整個人忽然好攰，手指的關節用力的時候有點'怨'；小腿會間歇腫起來，行又行得慢，行一陣又想休息；個肚又實的的，食完飯仲會覺得頂住自己；一返屋企就想灘係safo，跟手就訓著左。

睇黎喱個情況會維持到BB出世。

34週 - 爆紋

呀......呀......紋呀!!!

肚底發現左兩條短短的紋，叫ST幫忙睇清楚D。當佢仲研究緊時，自我安慰地解釋，可能係底底壓出的紋，點知ST居然用專家的口吻「據我的經驗，它一定係爆紋。」激死人啦!! 仲以為可以避過一劫添。

32週 - 照超聲波@廣華

26週的時候，經靚媽介紹搵左私家醫生照4D。本來ST和我都唔係打算照的，如果只係為左個見BB個樣。因為我地都不約而同覺得張4D相好恐怖。

不過聽番兩位媽媽的經歷又好似有D用。其中一位係照4D時發現BB頭頂的空隙比正常大，所以到現在小朋友兩歲了，健康院都有繼續跟進情況。而另一位媽媽照4D時發現臍帶纏頸，醫生提議開刀比較安全。所以終於'的'起心肝照4D。醫生一邊照一邊詳細解釋，唯一其中一個位置，醫生反覆睇完又睇，度完又度。最後醫生解說BB後腦的空隙比正常讀數1，大了少少(1.1 - 1.31不等)，仲寫紙俾我拎返醫院，當然再加幾句安慰「只一係少少姐」「始終機度有少少誤差」「都係穩陣D檢查清楚先」。所以廣華收到醫生紙，就幫我安排照一次超聲波。

相隔個半月，間中都會記掛BB唔知有無事，不過知道擔心都無補於事，倒不如靜待佳音。

下午二點半到左廣華，等左四十五分鐘，輪到我地入房。訓上床，醫生用一貫快、狠、準的政府醫生風格，掃視左BB的各個部位，仲念念有詞(有時都唔知對我地講定係自言自語)，只是知道大約的意思係一齊正常(咁就無問題啦^^)。當照到頭頂部份，醫生終於慢落黎，度下後腦的空隙仍然大少，不過醫生話黎個週數大少少係正常。而最緊要睇果個位置有無水泡，腦內有無烈紋，如果都無，讀數大少少，完全無問題。(安樂晒!!)

落左床，坐埋醫生枱，諗住醫生會一如往常寫完幾句，就「趕」我地走。點知醫生往後一申，從書櫃中取出成寸厚的書。我和ST互換一個眼色，拋書包~~。醫生就番到一頁，再詳細解一次，究竟超聲波內見到的情形，再對比書中正常的會係點，有事時又會係點。仲話果位私家醫生可能想穩陣D姐。(明白晒啦!!多謝你呀!!)

就係咁又過一關。