尋找SOFA @ GIORMANI

本來決定買IKEA張SOFA，不過買之前再度一次屋企的尺寸(其實一早度好晒，ST都寫好左)，度完發覺SOFA長左7cm，奇怪ST無發現這個問題，佢仲話可以將旁邊個架'朗'上SOFA面，吓?!....其實最後我都唔明點'朗'。不過我點都唔會俾你'朗'上去咖啦。
所以一係放棄個架，一係放棄張SOFA。

後來聽朋友講，GIORMANI有好多布藝SOFA，做緊75折。去開沙田，就去左HOMESQUARE的分店望下(即係宜家果棟)，店舖放的布SOFA唔算多六、七張左右，三坐位(減左之後)價錢大約四至六千蚊不等。尺寸可以改，不過可能要另外收費，我們問果張加長半尺，要加多千幾二千蚊，唔多花算。

不過我們又搵到一張適合ST和我的體型坐的SOFA，因為我們的體積有一段距離，所以很多時候佢坐得舒服，我就吊腳，到我覺得OK，佢又嫌短。而且我們同時鍾意挺身的，太軟會腰骨痛。所以試坐完之後，已經覺得係佢啦! 尺寸仲剛剛好，唔洗放棄原來的架。 不過聞說MEGABOX間GIORMANI仲大，都係睇定D先，反正優惠期到二月尾，影底MODLE NO就走左啦。

Mira 5059

二月的最後一個WEEKEND，終於有時間'貢'去MEGABOX，間分店真係大好多，有成廿幾三十張布SOFA。我跟ST講「不如唔睇MODLE，試坐完睇下搵唔搵得番張SOFA。」點知...原來店內無DISPLAY果張SOFA，哈哈...兩個傻仔好開心玩左大半個鍾。

本來可以用MODEL落單就算，不過事隔兩個星期，都係望多次，望清楚好D。所以又要去番沙田，真係新界九龍一日遊。

再坐一次，都仲有"就係你啦"的感覺，再望一望價錢，由原來五字頭變左四嫁?! 我的驚喜，引起左SALE姐姐的注意「係呀，本來75折，而定做緊7折呀。」YEAH!

跟住SALE姐姐又好好人話「可以揀布料和顏色。」我們就係布牆前玩左一陣，米白和灰色，最後米白當選。以為玩完，可以去食飯啦!

SALE姐姐又話「而家仲有多個優惠，額外布套只係$880，原價千八。仲包埋兩個枕套，原價一百個。」ST首先動搖，我們又黎去布牆前面，由原本只係眼望望手摸摸，SALE姐姐幫我地拎落黎打開拼下，到後來自己動手，拎晒D布落黎自己玩。SALE姐姐就由我地玩，行開去招呼新到的客人。又玩左半個鐘，最後一幅綠色布(模擬屋企幅牆的顏色)拼上灰色SOFA，叮!叮!叮! 搞咁耐，都只係買番最初想買的色。哈哈...

過大禮

我俾人訂左啦!!

跟據網上資料，「過大禮」就等如正式定立了婚約。(即係落大訂...訂左無得退嫁喎...哈哈)

長老擇左良晨吉日 - 辛卯年正月廿四巳時 (2011/02/26 9:00-11:00) ，ST就帶住兩位「專業家丁」(專業係因為已經有三四次大禮經驗的兄弟團)出發到我屋企，我們過大禮的用品一切從簡，一封「包羅萬有」利是、一籃水果、餅咭和潮式糕點(恩喂喎直~事咖技lung => 因為我爸係自己人...哈哈，所以用左潮式糕點代替中式唐餅)。其實長老話餅咭已經夠，不過我覺得難得一次，又只係派俾最親的親戚(都係潮州人)，就做多少少啦。

於是指派左ST去九龍城買啦，仲一定要買 貴嶼和記隆餅家 的潮點(因為我想食囉!阿妹嫁的時候食過，覺得幾好食，今次有人買埋送貨，仲唔落ORDER咩。辛苦左你啦ST...嘻嘻)。

係唔係好大埋頭呢?!我落ORDER時用手比畫，要買比三份一張A4紙大少少的禮盒裝，但是有傻仔份豪客，買左大過A4 SIZE的禮盒裝，抽餐死之餘，我家男長老仲罕有地開聲「買咁多做咩呀!」。哈哈...傻仔。

回禮之後，寒暄一番，就禮成啦!!

P.S. 飲茶的時候，女長老先記起未拜神，咁都得?!飲完茶，即刻去準備，女長老話有心唔怕遲喎!

擺?唔擺!...唔擺又擺!! (IV)

過完大禮就要派餅啦，黎樣野觸及我家女長老追溯黎番廿幾三年的「家族情仇」，講左成晚又話唔想請黎個果個(咁唔請囉!)，又話唔請又唔好(請囉!)，又話好煩(我仲煩呀!)，又話我唔就佢無旅行結婚(又講?!...唉!)。

到中場我先知來，原來今次長老們為了請唔請一個長輩而起紛爭，繼而燒著左間煙花廠。

搞左成晚，最後女長老的結論係全部親戚唔請，只係派出細佬妹，仲問我得唔得、好唔好。
吓...唉...我已經唔想再反抗啦，平靜地就「你揸主意啦!」
女長老'姪'左一下，估唔到我咁順灘，再講「咩我揸主意呀，我地可以商量。」
商量?!你當我係三歲咩?

經過今次我對那些死都要爭取真正的民主自由的人，多了點體會和了解。
不過在這件事上，我選擇放棄「民主」，再糾纏落去，都是浪費時間和精力，又吃力不討好。放開了，是晚睡得十分安隱。

事情就此一槌定音?當然唔係啦! 第二朝就已經又話要請啦!! .... (苦笑)
其實我想講，女長老，你要「唔」請邊個我都無任歡迎，反正無人在意。男家長老還在愁唔夠位請人呢!

OUR RING {A Diamond} - 制成品

其實介指上年八月已經造好(老闆好準時交貸)，一直由ST保管，所以我無機會慢慢影相。提貸的時候，離BIG DAY仲有半年，老闆特意提醒我地BIG DAY前一個月要拎出黎試下，如果SIZE有變可以拎黎去再改，真係細心。所以今日好乖咁，拎出黎試下。

介指的外型成個皇冠咁，我果隻小頂部有三粒小的紅寶，ST果隻就係一粒藍寶（不過而家先發覺影得唔清楚ｔｉｍ，大家想像下啦！^^"），底部換轉我藍ST紅，旁邊砌左我地的BIG DAY和縮寫。帶落都幾舒服。

影相的時候，睇住一個大圈加一個細圈，（有ｄ角度睇）大圈好似包住個細圈，不期然就會有點甜絲絲，好WARM咁感覺，最後發覺自己傻笑緊。（哈哈...好彩ST行開左，唔係以為我忙到傻左。)

完婚之後，我會物識一條頸練，將介指變成練咀帶。嘻嘻...唔好'side'!!

HONEYMOON - 未出發先興奮

一直想放一個長假旅行，但是每次度完都會不了了之，除了財政緊絀外，假期都十分緊絀，ST和我份工都唔係果d廿日年假，放成個月都老闆都唔炸型的工。更甚是準時放工都要"預早"通知老細。有時女長老對我的工作時間都會投訴下，我只可以講「媽，世界難撈呀!」

所以我對HONEYMOON沒有太大的憧憬，跟ST的共識係"放到假先算啦"。所以連去邊都無諗過。

不過最新的故事發展係~~

兩個月前，朋友問「去邊HONEYMOON?」，ST答「英國啦!」，我望住ST心諗「點解我唔知咖?!」不過個心又有小小甜，因為ST知我想去英國。

一個月前，我心思思問「真係去英國呀!(試探地)去幾耐好呢?」，ST答「兩個星期啦!」，「吓!真咖?!」超開心呀，之前要ST放多過一個星期的假，佢都會依依哦哦，又話怕老細炸型，又話怕公司多野做。不過今次輪到我怕老細炸型，因為返工唔夠一個月我已經去左日本玩，而家又請假，真係搏抄。本住一死，都要搵機會問下老細。

三日前，機會黎啦。老細挑起條根，要同我地TEAM MEMBERS逐個傾。
輪到我，老細的開場白「點呀返左兩個月，覺得點呀?...之後你的工作安排就會係....(刪去幾百宇的正經野)」
講完佢要講咖野之後，我話有野講。
老細第一個反應係「你唔係又放假麻?」
嘻..嘻「我要結婚。」
「吓?!...恭喜晒，咁你大晒啦!!...(刪去幾百宇的八卦野)...定左幾時放假就早D講我知啦，我要安排下工作。」
YEAH!老細真係好人呀!

兩日前，急不及待搵AGENT問飛機...哈哈...未出發已經好興奮啦!!

WEDDING PHOTOGRAPHER {THOMAS NG @ MORE PRODUCTION}

尋晚去約了我們的攝影師THOMAS見面，傾下BIG DAY的RUNDOWN。

THOMAS見面的第一句「咁快又一年啦」係呀，舊年農年才剛剛開始籌備，第一個決定就是找THOMAS幫手，轉眼下個月就到啦。

找THOMAS的原因係ST的一句COMMENT。當時網上睇左一大埋靚靚結婚相，我開始有點迷失，POST出來的相一定靚，但是輪到我影的時候，仲係唔係咁靚，同埋可不可以捕捉到當時的情景和神態。

最後搞左成個月，免強SHORT LIST左七八個名單出來，跟ST講我揀唔到，你揀啦!就係咁ST不費吹灰之力(唔洗一個鐘)就揀左THOMAS。「點解呀?」「因為有電影感囉!」吓!佢肯定的語氣，我都唔想再質疑。

再搵THOMAS的時候，收到一個壞消息，日子無問題不過加左價，加左三份一呀(過年前跟過年後差咁遠咖)!!第二次再見之前已經諗好點樣講價(如果唔減，我又要煩過啦)。好彩THOMAS好NICE，我只講到過年前仲係收舊價，佢就溫文地解釋「因為新的價目未出得切，不過無問題，就用番舊價啦」慳番我預備左的唇舌。

一年之後，第三次見面，THOMAS仍然溫文有禮，言談間還是感覺到佢的堅持和執著，例如他的即日HIGHLIGHT，如果放在敬酒後播放，他認真地希望新娘看完才去轉妝(嘻嘻，無問題呀，我都無打算轉)。連播片要注意先轉暗燈光，再PLAY碟的細節會提醒我們，如果調轉，頭五六張相會睇唔到。

聽左我們的RUNDOWN，他就好像會在腦內PRE-PLAY一次，然後提醒我們要注意的地方。

例如新娘化妝先定媽媽先?多數都係新娘先。但是他有另一番見解，媽媽先新娘後，因為所有人要準備好去等新娘搞掂，唔會要新娘等媽媽化妝再影褂相，因為新娘未著褂其他都影唔到。初時聽到都覺得「嗯...如果趕唔切點算?!」，不過諗番之前姊妹的經驗，朝早媽媽通常都左搞右搞，唔肯換衫(應該係驚整污'joe')，姊妹的我會發出溫馨提示，請伯母換衫跟住等化妝，不過通常的回應都係「唏，好快姐，吐件衫就得嫁啦，我都無野要搞。」(Auntie，得番45分鐘就要開門，換完衫仲要化妝和左影右影喎!!)最後都係要出動新娘大叫「媽，佢地就到啦，快D去換衫啦。」伯母先肯換。

證婚時新人要正面向著對方，因為我們會先站在枱前宣讀誓詞和交換介指，律師遞介指俾時，多數人下意識會轉向律師少少(即背脊向多左賓客)之後就唔會轉番出黎，咁樣企係律師身後方的攝影師就會好開心，佢會清楚影到新人，不過企係賓客那邊的攝影師就只影到新人背面。所以正面向著你的另一半(唔係證婚律師)，前後的攝影師都可以捕捉到你的神情。

CUT CAKE時蛋糕的擺位，在草地註冊完畢，MATCH OUT 再 MATCH IN 就會切蛋糕祝酒，順理成章地蛋糕放係註冊枱的旁邊，切的時候就行埋去蛋糕。THOMAS問「個蛋糕係點嫁?有幾大個?」係喎!個蛋糕得兩三層又無台，後邊的人米咩多數睇唔到囉。所以提議我們找弟兄幫手，搬過少少去番中間，多D人睇到。祝酒又係，大家排排坐多數無杯係手，我們興高彩烈舉杯，賓客只可以鼓掌。經佢提點之後，我們會要求到會的工作人員幫手過去SEVER飲品。大家就可以一齊舉杯，氣氛都會熱鬧D。

就連晚宴的膳食，THOMAS都要求不用留位給他和他的團隊，只須另開一小桌提供抄飯麵就可以，因為要快，想盡快食飽，就可以繼續開工。(真的想跟他講慢慢食啦，唔趕嫁。不過又慶幸遇到個有熱誠的攝影師。)

傾完之後，我放心了，相信THOMAS的專業和細心。希望當日天公造美就好了!

SONG LIST

收到LAYDBIRD的PROPOSED SONG LIST， 分開幾部份MARCH-IN前、MARCH-IN、CEREMONY BACKGROUND MUSIC、CEREMONY之後，有成廿幾三十首歌，只係睇歌名都唔知咩黎嫁(我音樂知識實在太少^^")，唯有上YOUTUBE搜尋，一隻一隻聽，原完有好多都係廣告/電影聽過的歌，或者係經典金曲。

一邊聽一邊揀，才發覺揀歌去營造想要的氣氛(對我)都有一定的難度。如例UNFORGETABLE係一首好有意思的抒情歌，不過我都係忍心抽走，原因係我驚會係暖和的陽光下草地上訓著...就唔係咁好啦! ^^"

另一首Quizas(解作"可以嗎")係花樣年華裡出現過，很有味道，不過歌詞的大意是男人一直等待女人回覆時死忐忑不安的心情，而女人就一直表現得無綾兩可。這個意境跟婚禮好似兩碼子的事...哈哈...如果到時我一直唔講"我願意"唔知大家會有咩反應呢?....哈哈...

搜尋的同時找到些輕快的歌曲，想分享下。

-       Everything – Michael Buble http://www.youtube.com/watch?v=_W9zNfDeD1k

-       Lucky – Jason Mraz & Colbie Caillat http://www.youtube.com/watch?v=acvIVA9-FMQ

-       Caret Music website http://www.tcartermusic.com/featured_videos

INVITATION CARD電子化

由於註冊和擺酒相距個幾月，加上邀請的對象有點不同，註冊會偏向多請ST和我的朋友和直繫親屬，擺酒會多請親戚和長老的朋友。接著就有一堆問題出現，帖分一次派定兩次派，親戚去完又去...等問題。好彩今次兩派長老的方向一致，主張分開派(米玩我啦!邊有咁多時間派呀?)，而且將重點都落在擺酒上。至於註冊，有帖可以，無帖亦無不可。所以左度右度之後，我大膽地提議用E-MAIL通知大家註冊的時間地點。

因為受邀的除了幾個最親的家庭(長老一口答應會以口相傳消息)，就是最熟的朋友了。朋友群平時就已經常用FACEBOOK、MSN和EMAIL來搞聚會，所以無難度。
不過為表誠意，我會先當面\用電話\用MSN邀請他們，既可以吹吹水，又可以提他們留意地點(唔好去錯九龍公園!!...如果唔係，唔好怪我地將你成變聚會的笑話之一，無得嬲咖)。之後再用自家制的E-INVITATION(白紙黑字)通知一次(唔好同我講聽錯日期時間呀!...同樣你的傻事是會傳'頌'千古咖...哈哈)。最後可以的話，一個星期前再搵他們一次。

希望這個安排，比起去到酒樓先拎到帖，或者是幾年唔出現，一出現就派帖，食完餐飯，又玩失蹤，前前後後單獨講唔夠十句，好少少啦!

所以現在正努力"研製"我的E-INVITATION。

印帖

上星期收集左男家長老的意見，得出盡早印制喜帖的"最高指令"，所以ST和我不敢抬慢，星期六就去左酒樓拎帖去印。

印刷店也是酒樓經理介紹的，粗略了解過報價，頭一百張一百八十(最低消費)，之後每張一蚊，埋單大約三百。所以ST和我都賴再去格價。荃灣拎帖，葵興交低。

喜帖項目半小時內完成! YEAH!

THE ONE {Bridal Signature}

為了讓賓客留下「新娘大方優雅」的印象，我還是走訪了十數間婚紗店。後來撞上了位於灣仔的 BRIDAL SIGNATURE。

(一年前)這店在BLOGGER間流傳的SHOP LIST中很少出現，只是無意中在零星的BLOG裡看到，相中的婚紗很優雅。盡管一試。

接待我們的是老闆娘WINDY，性格爽朗，著我們隨便看看架上的婚紗，又問我想找的款式再作推介。一排架上大約有二三十件，數量不多(經過一年時間，尋日再上去已經多左兩排架的衫啦, 聽老闆娘講最近仲好旺場，星期六的BOOKING已經FULL左。)，不過又出奇地同時有兩件彈左出黎，一致讚好。

一件清麗，LOW-CUT大A-LINE，上身LACE下身鍛質拖尾。(可惜搵唔到相!!)

另一件簡單又不失高貴，LOW-CUT高腰小A-LINE，全件LACE釘珠，腰間有閃石。

(photo from Bridal Signature)

兩種效果，同樣喜歡。最後揀左邊款? 暫時買個關子。 ^^

尋紗記

大婚當日，女孩子想要的係咩? .......靚囉......搞咁多野都係想靚人靚景靚花靚環境，為博大家一句「好靚呀!!」。

正所謂人靠衣裝，就從婚紗入手。首先在網上找來一份婚紗店LIST，還詳盡地列出地址、電話、價格、親身評語和可以免費試穿的件數等。根據價格和評語先作篩選，再分地區一一預約(一般早兩日預約即可)，每次一區。

個人認為初期什麼 A-LINE, 公主裙, 魚尾, DEEP-V, LOW CUT...都要試下，試過後，慢慢地自然會知道自己的喜好。好似我一直認為自己著唔到魚尾，但係試過之後又覺得OK(最大原因係CUTTING靚...呵呵)，可惜跟我的風格不相襯。

亦不要急於落訂，除非已經了解自己的需要。

揀衫的過程有樣好重要的配件，就係倍你揀衫的人選。
親身目擊一位準新娘跟她的朋友在一間婚紗公司挑選婚紗，架上的婚紗的款式大多用上大量LACE，比較斯文典雅的類型。看得出準新娘揀得不奕樂乎，每見到合心意的都讓朋友看一看，不過她的朋友總是蹺起手板著臉說不，新娘無奈地繼續揀。
後來總算，挑了一件試試，準新娘換好走出來。兩個八卦妹(我和我的朋友)當然"牛咁眼"望住新娘身上的婚紗，手又不忙揀架上婚紗，準新娘用期待的眼神詢問朋友的意見，朋友首次大聲發言「咁多LACE都唔靚嫁...咁老土...」全場靜哂...新娘好失望呀，兩個八卦妹對望O咀，還好店員打圓場，只集中跟新娘講解那婚紗的特點。

好明顯新娘跟朋友的口味南轅北轍，就算口味不同，最好還是邀請一些THINK POSITVE的朋友同行吧。

另一次遇上一對準新人，新娘身材中等，蜜糖膚色，留著一把長曲髮，樣子甜美。她正試穿一條魚尾型的婚紗，以女性的角度評審(即兩個八卦妹)，覺得那婚紗很襯她，很美(亦係佢令我有一試魚尾的衝動)。新娘自己似乎都很滿意，不過站在一旁的新郎黑面地說「著得條腰好粗」。吓?咁都粗? (我都有試那件婚紗，我們高度相約，腰位我只是剛好拉上，而新娘的腰位還要改窄呢!)

從店員口中得知，之前新娘自己已經黎過兩次看那婚紗了，今次帶同新郎再來是想拍板，不過最後不歡而散，火藥甚濃。

其實在我的回憶中，這些小故事比婚紗的款式更加精彩。所以尋找婚紗過程的記憶就只剩下這些鎖碎事和八卦妹的相伴和「專業意見」，對每件婚紗的印象反而變得模糊。舉一反三，幾年甚至幾十年後，留在記憶裡的婚禮應該會是大家的笑容和祝福、姊妹們盡責的照顧、新娘大方優雅的姿態、又或是新郎「唔覺意」踩住婚紗裙腳的小趣事。至於婚紗上多一隻蝴蝶結或少幾塊閃石，A-LINE定傘裙又會有誰念念不忘呢?!(新娘本人除外 ^^")

收集意見

聯席會議之後，雙方長老總算達成大方向的共識，要點都已經落實，如出門的日子時晨、酒席圍數、名目是迎親定聯婚等。

接著就是細節上的安排，大至當日行程、交通安排、賓客名單、坐位安排、菜單，小至奉茶次序、午膳安排、女長老禮服顏色、發帖時間，
長老們都可能各有意見。
所以我決定快快手"參考"坊間的行程，就跟男家長老開一次會，收集意見(既可以表示專重長老，又唔洗自己死度爛度或者跟ST意見分歧)。
坐位安排採用劃枱制，先讓長老揀好枱的位置和數目(各自諗掂邊個唔同邊個坐，邊個要坐前D，唔洗我煩)。

幸運地，其實男家長老都是明白事理、開明的一群，所以沒有提出太多限制，很易話為。有時反而覺得ST"無理"，例如早前ST認為男家奉茶一個小時唔夠，我問到時有幾多位長輩，他又「依依鵝鵝」，最後就不了了之。
今次重提"舊事"，ST第一個反應同樣話「不夠!」，男長老亦同時表態「咩都夠啦，只係邊個邊個...和邊個，一個鍾夠晒啦!」呵呵...大票支持，問題解決。

是次會議最有趣的發現是男家男長老對喜帖印刷的時間相當著緊，認為要有帖先可以去邀請賓客，跟現在流行的口頭邀請再發喜帖有點不同。
不過無問題，我會優先處理印帖的事。

尋找工作椅@COME IN'

自上次IKEA之後，再未有時間睇傢俬。上星期六再次出撃，目的地牛頭角工業區內的COME IN'，睇網頁就覺得它的家具好靚，好有STYLE。

店裡格調跟家具一樣走型格路線，簡單的裝修，暗黃的燈光加上射燈(不過燈光的CONTRAST太大，我隻眼唔太舒服)，可惜地方不大(有約四百呎吧)，陳述的家品不多，都已經在網頁上見過。
而實物的質素跟相中的亦差不多。所以逗留10分鐘就走了。

雖然快，不過初步都物識到我的工作椅，係後選名單之一。

(from Come In')

P.S. COME IN' 好似唔收CREDIT CARD。不過可以打電話去落ORDER(唔洗走多轉)。

場地佈置 & 花球 {CHERISH WEDDING DECORATION}

記得去年，除了攝影和酒樓外，最努力去搵的就是場地佈置。市面雖然有好多選擇，不過要搵心頭，又唔OUT BUDGET，都有少少難度。

上網做左RESEARCH，SHORT LIST左幾間，CHERISH係其中一間。印象最深刻的JOB REFERENCE是在山頂的一間餐廳，沒有公式的背景板，換上大大小小鮮花的佈置，可以吸引到眼光，但簡單。我心目中的SIMPLE ELEGENT 就係咁啦。所以第一個就約她見面。

第一次見面，RON本人跟她的設計一樣，簡單舒服。整個過程都無SELL過野，只係SHOW你睇以前的REFERENCE，讓你了解多點，買唔買無所謂。傾左個幾鍾之後，ST和我都覺得就係佢啦，無(賴)再去搵第二間比較。

轉眼就過左八個月，上星期再見RON就係要傾佈置的細節。雖然我做了些功課，準備了一些相做REFERENCE。

不過當被問到一些細節，有時我會發呆(因為實在無諗過)或者講些空泛的形容詞(好似要簡單D呀，清D呀，唔鍾意喱種(鍾意咩?!唔知喎))，
而RON都會識地找些REFERENCE問「係唔係咁呢?」「或者咁?」「咁樣都可以喎!」，相當有耐性。

除了佈置，RON仲會幫我造花球，其實我對花球無咩偏愛，型的奇特的都唔係我杯茶，還是當造的，粉粉白白，圓碌碌加條絲帶就可以了，唯一堅持是用鮮花。
傾下傾下，RON提議用玲蘭。嘩!我本來好鐘意這種花，估唔到可以做花球。THE ONE終於出現左啦!

又是一件令人期待的項目!!

WEDDING LOGO

差不多構思了一年的LOGO。由資料搜集，參考其他人的DESIGN，從中找出ST和自己的喜好和風格。不斷拼貼，再被BAND或自已BAND自己。哈...哈...

綠色 - 主要想配合草地禮婚
啡色 - 個人覺得綠跟啡係perfect match
黃色 - 作為點綴，加點生氣

色調仍需要微調一下，例如(ST話)綠色未夠淺色，(我話)啡色還未係心中想要的。

接著就要研究一下，怎樣將它變成可以派出去的邀請咭啦。

LIVE BAND {LADYBIRD}

草地上註冊時候，如果有現場音樂，隨住當時的情況，用音樂帶起賓客和現場的氣氛，成件事會好完美(幻想中...)。ST亦好似唔需要思索，就已經決定要(喂!先生，完美係要好多資源去支持咖喎!你睇左價錢未咖?!)。

為了讓ST諗清楚，問清楚，係見到張單的時候唔被機會佢太叫「咁貴」(ST有時都幾無賴，明明已經講過佢知，佢亦都無意見，但到最後就扮失憶...哈哈...激死人)。
所以去年八月上網搵左一埋LIVE BAND的資料，就交左俾ST去搵人報價。最後據「探子」回報，只得一間有回覆~~LADYBIRD(咁慘，無人理你?!)。

望住報價，下午三、四小時的EVENT，接近一萬收費(不過好在已經包括所有費用)...還是猶豫不決...

踏入2011年，很多逃避左好耐的問題，都要搬番出黎，一一處理。思前想後半年，還是很想很想...即是唔係一時衝動啦，同自己講如果他們仲AVAILABLE，咁就GO啦，唔係就算數，當無緣囉。

之後「探子」就回報仲OK，於是再SEARCH一下網上的評語，看一看佢地慣常的音樂風格，裡面有BOSSA NOVA JAZZ，完全中晒(係我杯茶)，又係佢地的強項，真好。

「探子」再回報時，就已經訂左落。(突然間效率高左!) 更加好期待註冊的日子呀!

接下來，二月尾就會DRAFT一份演奏的次序俾我們，再開會傾下。

出走日本.滑雪去 - DAY 5

2011/1/30 多雲  東京[新宿] - 香港

09:45   自然醒。真好!
10:15   早餐時間完結前，還可慢嘆一個早餐。
11:15   CHECK-OUT。再出動，目的地新宿各購物點。天氣有點凍，可能沒有陽光的關係。
11:30   JR COUNTER 換好出機場的N'EX的乘車劵。
13:45   係TOKYU HANDS溜連左兩個鍾，略有收獲。
14:00   快速地KO左個魚柳包(唔係麥當當呀)。
15:15   行番酒店其實都要花點時間(直走只要7分鐘)，因為會經過100円店、BIG CAMERA...哈哈
15:32   還好趕上3分鐘後開出的N'EX。險!
19:30   飛機準時地離開東京成田機。

是次滑雪之旅完滿結束。明天又是努力工作的一天，為的是再次出走。加油!!

出走日本.滑雪去 - DAY 4

2011/1/29 天晴  新潟[越後湯沢] - [GALA湯沢] - 東京[新宿]

訓醒拉開窗廉，陽光明媚，期待的藍天白雪，終於遇到。今日將會是很好的一天(遲D就知!!)

不知道是這裡時間走得快，還是這裡讓人放慢了步伐，明明預了充足時間又沒有賴床，最後都係無時間食早飯?! 哈...哈...

先去前枱Check-out和存放行李，再買半日覽車票(係酒店買比滑雪場買平千多円)。匆匆食完自助早餐，就出發去車站。

好事一件
原先想趕上8:52分的接駁車，但是去到車站後，一望去~~人呀!!可能有百幾人在等車，跟昨天的冷清完全不一樣。

數學題: 二十人一架車，30分鐘一班，望不龍尾的人在等車，究竟幾時先去到滑雪場?二小時，三小時...?

二話不說，拖著ST衝入JR站搭新幹線去。有點疑惑，出面咁多人等車，點解JR站無人嫁?唔搭JR?所以我地去COUNTER重複再碓定一次，有車可以去到GALA湯沢和下一班車的時間9:18，接著我地滿意地走了(隱約覺得COUNTER小姐奇怪我地就這樣離開)。都不多想，拍西瓜咭入閘，Doo...Doo...唔俾入!點解呀?即時站務員過來講一輪日文...之後加埋身體語言，ST又明喎!佢叫我地去COUNTER買飛。

又走回COUNTER(哈哈...原來COUNTER小姐奇怪我地問完就走，唔買飛。一張單程票就要240円，搭一個站3分鐘，難怪咁多人等免費車)。ANYWAY忙亂之後，總算搞掂，還有15分鐘先上車。

好事兩件
為了不出亂子，還是乖乖的先到月台等車。用搭扶手電梯上月台時，手上把玩著兩張車券(乗車券+特別料金券)，正轉身想跟ST研究車飛時，一陣怪風，乗車券脫手直插電梯隙(呀...無左無左...點解唔係平趺咖?!ST的表情應該係想打死我，而就在這個應該係傳說的鬧交位，ST只係講「最差都係補錢」)。跟住我地就走番去入閘跟站務員解釋情況。雞同鴨講完一輪後，大致叫我地先去GALA，出閘時再跟站務員講。(...今日真黑仔!!好彩仲可以趕上原來的火車)

一群人湧落車，一群人湧出閘，原先想好的解釋，站務員聽左兩句，再看一看張飛就俾我出閘(唔洗補錢)。YEAH!

好事三件
真係好多(日本)人，好彩已經熟識架部，好快就可以拎到裝備，換好衫就上山去。

今日天朗氣朗清，能見度高，可以遠眺山下，白茫茫一片地，很美。雪停了，滑雪的人多了，雪地被壓實了，相對昨天容易滑了，對腳不會無固被雪埋住，而動彈不得，不過趺的時候就會痛D。^^ 真好短短兩日，就讓我們遇到二種截然不同的雪地的景致，真的不枉此行。

今日的行程就只有半日滑雪，午飯後就要準備回東京。好唔捨得，才剛剛玩得興起!

衝刺最終回
2:20又返到JR越後湯沢站找吃(其實溫泉街還有其他食店，不過實在玩倦了又想留多D時間慢慢食，所以就在站內找吃算了)，經過第一間食店，研究緊它的餐牌時，被老闆叫住，示意試下招牌烤豚肉，試過都好味喎，就它啦。坐好後，留意到老闆總會用這招來吸引客人，見過試完唔買，老闆又是喜孜孜的，真會做生意。

食完仲有時間，衝入手信再剎一轉。今天時間尚早，試食的品種多很多呢!

回程搭JR經大宮返到新宿時已經是傍晚六點，今晚會住返第一晚的酒店 BEST WESTERN SHINJUKU ASTINA HOTEL，安頓好後今晚的節目就係食和買，伊勢丹、無印、藥房...未關門的就衝入去呀!

是日晚餐即叫即炸天麩羅 天ぷらつな八(總店)。因為言語不通，只好乖乖地點英文餐牌上的套餐(同樣是即制)，還圖文並荗地介紹各樣調味和醬汁。

看著鄰座的日本人散叫時令的鰻魚的天麩羅，見師傅手起刀落，兩下就生拆魚骨。上枱的時候，除魚肉之外，還將條魚骨炸至金黃香脆，兩位日本客人先是禮讓一番，跟住之就分甘同味(其實我都好想試下)，可憐兩塊魚肉竟輪為陪襯。

聯席會議

首次聯席會議(拖無可拖之下)，今日終於順利完成。雙方長老正式會晤，大方向已經落實~~

3.26 草地註冊

5.15 出門&入門+擺酒。擺酒會以"聯婚"之名出戰。

纏繞一年的問題終於搞定。YEAH!!

出走日本.滑雪去 - DAY 3

2011/1/28 曇り時々雪  新潟[越後湯沢] - [GALA湯沢]

訓醒，打開窗望出去，超正呀!

吃過豐富美味的早餐，整理好行裝。尋晚約好的酒店車就準時黎到接我地啦。

五分鐘的車程，就到左另一間溫泉酒店 湯沢グランドホテル。寄存好行理，跟RECEPTION先生要了雪場的一日覽車證(住宿PACKAGE包的)，就出發啦!

走落斜路，係大路轉右，井仙門外就已經係去GALA滑雪場的SHUTTLE車站，30分鐘一班，免費的。(同一個站，有去上越國際的車，小心上錯車。)剛好趕上9:18的車，平日的關係，只得半車人，個個都全副滑雪裝備，望真D全部都一把年紀，但是大家都精神奕奕，醒醒目目的。可憐我地兩個"小朋友"傻下傻下咁，好緊張呀。

五分鐘車程就到左滑雪場(總站)，隨住人群入LIFT出LIFT就到了滑雪場的大堂。

出左LIFT轉左就係INFORMATION CENTER，先換了覽車證(那裡有外藉員工，英文溝通完全無問題)。如果要租滑雪用品，係大堂中央會搵張表格，填好要租的ITEMS(雖然係日文表格，不過抬頭望下，就會有日英對照表，教你點填)， 填好後就去交錢。上層還有浸溫泉的地方，另外收費。

之後再連同收據交去旁邊的COUNTER(LIFT的左手邊)，拎齊野就可以去換衫，係更衣室內有大量LOCKER，SIZE足夠放一個大喼，1000YEN全日任用。

可惜我只係影左大堂的另一邊手信店...嘻嘻...左邊仍可見LIFT口和INFORMATION CENTER。

鎖好晒D野，就拎住塊SNOWBOARD，搭覽車叼。(足足擾攘左一個鐘，好彩今日唔多人，只係我地手腳慢。)

上到山腰，走出覽車站，就會見到滑雪學校和餐廳。室外就已經係滑雪的地方。因為第一次，未敢坐吊車再上，我地只係覽車站左邊的斜坡試試下，後黎就越行越高。玩左四轉已經好攰，唔係滑雪辛苦，是行上廿分鐘已經無氣，滑落黎只係兩分鐘。(後黎發現行上去的高度，跟吊車去的高度差不多呀!!哈哈...浪費我的力氣向上爬!)

在餐廳食左個簡單的午餐之後(價錢和質素都可以接受)，稍事休息，下午就開始試坐吊車，而我最大的問題出現左。估計可能怕拎住SNOWBOARD搭吊車中途趺左(真係唔知點執)，所以上吊車前已經要先著好一邊腳，所以情況好似係跛左一隻腳，但係又要好快咁'吉'下'吉'行(當然熟練的可以瀟灑咁雙腳踩板咁滑行啦)。上吊車還好，工作人員可以幫忙拉一拉吊車，等你READY再坐落去。但是落車就煩啦，起身再行(滑)開(唔好忘記,你係行動不便咖)。每次我都是一跛一碌咁落車(超難睇果種)。
之後發現終點的工作人員每次見我上緊去，就會係屋仔走出黎幫忙拉一拉吊車(其他人落車佢只會坐係屋仔度望住)，雖然有人幫，不過我仍然好緊張地衝前碌落地。(唉~~唔知落吊車有無堂上咖?!)

今日全程都落住粉雪，不斷有新雪補充，造成軟綿綿的雪地，所以趺倒都唔覺庝，感覺超爽。不過眼罩內的霧氣就難搞了，唔帶的話，滑行時雪又會飄入眼。

不經不覺，玩到四點已經筋疲力竭，決定留待明天繼續。換過衫，還了裝備。就原路返酒店。

晚飯前又係SHOPPING時間，去番JR車站，先預訂好明天回東京的新幹線(明天星期六怕遇上即日回去的人潮，還是買了指定席)。再逛手信店掃一轉。

今晚酒店晚飯係自助餐，嗯~~OK啦。可能尋晚食得太好，將之比下去。不過"辛勞"完一日，要食番多D補充下。哈哈...

飯後節目，溫泉以外，就係洗衫和烤乾D衫。兩晚的酒店有同一特色，就係房內有強勁的暖爐，十分鐘可以烤乾一件短袖T-SHIRT。玩左一日，手套冷帽都濕晒，烤乾了，暖烘烘的，明天又可以出動!

出走日本.滑雪去 - DAY 2

2011/1/27 天晴 東京[新宿] - 東京[淺草] - 新潟[越後湯沢]

又係爭扎的時候，究竟去旅行，應唔應早起身過番工呢?!原定淺草寺加下町美食的行程，最後只剩下淺草寺...哈哈...下次再去吧!!

以前都有到過好幾個日本地方的寺，所以新鮮感欠奉。不過仍然喜歡到寺一遊，因為那裡舒服安寧的氣氛，還是讓人心懭神怡，留連忘返。每次我們都會話「如果住日本，黎消磨周未都幾好」。(哈!哈!諗下姐)

寺前的仲見世，熱熱鬧鬧的，行過幾檔人型燒，最後都忍不住要消費一下，五百YEN十個。還想試試雪糕人型燒，不過實太冷了，捱不住放棄。即燒醬汁米餅，溫溫的，味道不錯。

之後係地鐵附近，食左碗拉麵，就趕車去新潟了。

第一次係JR上野站搭新幹線，加加埋埋有成廿幾個月台，拖住個喼都轉左一陣先搵到方向。新幹線的月台，其實集中在另一邊，要再過一次入票閘先到(所以要趕車的話，都係預多少少時間)。

今次日本之行主要去滑雪，目的地"GALA湯沢"滑雪場，會係越後湯沢留宿。由 上野 去 越後湯沢 直接的方法係搭 上越新幹線(JOETSU SHINKANSEN)，70分鍾就到，差不多一個鐘一班(FROM TOKYO / TO TOKYO)。
這條線有自由席和指定席，太約相差五百YEN(如果我無聽/記錯的話)。

《雪國》：「穿過邊界長長的隧道，就來到了雪國...」

未出發之前，提到越後湯沢就會引用以上的句子，一直都不以為意，但是當親歷其境時，句說話又真係好到肉。上車之後，暖暖的車箱中訓下醒下，出現過的片段有天朗氣清的郊區...黑漆的隧道...仍然天朗氣清...隧道...很遠很遠的山頂有少少雪(都係咁咋?!)

再醒的時候就要準備下車，再瞄一瞄出車窗外，呆左10秒...嘩...嘩...雪國呀...真係鋪天蓋地都係雪呀!!哈...哈...請原諒我大鄉里。第一次親眼見落雪，心情超級興奮。

換過行山鞋，帶好冷帽、頸巾、手套，就殺有介事地拖著喼走出車站。放眼望去，又係呆左，全地鋪著雪，路呢?!點行呀?人影又無!

唯有硬住頭皮衝出去再算，因為旅館離車站就只是兩分鐘腳程(安慰自己)。後來行了五六分鐘，越唔對路，點解仲未到，只好原路折返，才發覺酒店就係街頭，因為大雪遮住招牌，我地錯過左行左去街尾。(哈哈...這就是我第一次雪中步行的經驗，感覺好濕。下次要做好防水準備。)

走進溫泉旅館 白銀閣 華の宵，接待用緊有的英文幫我們做登記，定好早晚餐的時間，帶我們地入房，再簡介紹旅館的設備，佢地的專業和禮貌感覺窩心。

晚飯前仲有時間就再次出動。有左剛才的教訓和雪地拖喼的經驗，我地第一個任務就係要搵下第二晚間溫泉酒店係邊(係呀!諗番都覺得自己身痕，同一個地區都晚晚轉酒店。其實一間係JR站的東邊，另一間係西邊，同樣離車站兩分鐘腳程，唔拖喼和無雪的情況下。)

好彩搵一搵先，因為又行錯路，去左酒店的後欄，無法啦，當係探險。

最後搵到酒店前門，就厚住面皮問RECEPTION可唔可以第朝安排車接我地過來。(連自己都覺得搞事，明明自己已經過左黎，第二朝都係要搵車接。)要表達D咁複雜的情況，RECEPTION先生好似唔係好明，唔知點算之際，佢要我地等等，去搵一位會講普通話的人出黎。鬆左口氣，事情終於解決了，約好時間，我地就落番山(坡)啦!(係呀，間溫泉酒店係山坡上，要搬埋行李真係有D難搞。)

在大雪下的越後湯沢，可以逛的地方其實不多，除了滑雪場和旅館，留連最多的就係JR站。那裡有各式各樣的土產，如果時間早，仲有得試食完先買(晏左就俾人食晒啦)。

七點鐘待應準時送飯入房。(因為係房食的關係，真係唔多覺有其他客人。)

食飽休息一下，再浸下溫泉。執埋第日的裝備就訓啦.

P.S. 浸完溫泉，經過RECEPTION俾人叫住，送左兩包新潟的魚沼米俾我地。哈...哈...剛才仲諗好唔好托番包米返香港，俾阿媽知道七八十蚊一公斤，實話敗家。而家就可以理直氣壯話「唔拎返黎好浪費咖」。

出走日本.滑雪去 - DAY 1

2011/1/26 天晴 2-7º C 香港 > 東京[新宿]

今年的冬天特別冷，新潟積雪有三米幾，連當地人都話「有好幾年沒有落(雪)得這麼多了」。一日一夜不停地飄下粉雪，晚上還見到一條小路出大門，朝早小路已經淹沒在雪埋下。

由於今次日本主題係滑雪，所以根本無懼「惡劣」天氣，仲暗暗大叫「落吧!落吧!」哈...哈...

出發
今次搭HONG KONG EXPRESS，點半飛，所以唔洗天未光就摸黑入機場(有時覺得放假無理由早起身過番工)，但是係東京落機就已經六點。而返香港的時間就用得好盡，七點半東京飛零晨到香港。二千一蚊張機票，都算OK啦。

話說HK EXPRESS的CHECK-IN COUNTER係二號客運大樓(T2)，ST和我都未去過，加上我地各自落車的地點唔同(原來伕他要在停車場落，行遠好多!)，所以搞左陣，都係各自搵路過去T2。其實由T1去T2好簡單，平時T1去搭巴士條路，臨離開T1前旁邊有幅好橙(色)又發光的牆，轉入去就去到T2。如果已經係T1離境層，行去機鐵方向搵LIFT搭落L3就會見到橙光通道。

如果CHECK-IN完想返過T1食野買野，之後直接係T1入閘就好了，因為T2入閘之後還是要搭無人架駛返去T1那邊登機。我想下次我還是自己"蕩"回去T1入閘好了。在登機口遇上意見搜集員問對T2的路牌指示的意見，哈...哈...因為放假，心情好就睬下佢啦，換轉平日只會講"唔得閒，趕時間"。

第一次搭HK EXPRESS去東京，感覺唔錯。機艙新淨；有好多電影揀，來回全程煲碟(好耐都無機會連煲二三套戲啦)；飛機餐都算幾好，至少我會成份食晒(試過有次難食到，食左兩口就停手唔想再食)；收餐之後又不時派飲品/水(讚)。

著地
六點十分降落成田T2，七點已經拎埋行李出左閘，超順暢，可能晏左無咁多機/人。望住鐵路的標示，搭扶手電梯落B1，就已經見到綠色窗口。埋去只係講「GO TO SHINJUKU」，再俾埋本護照，職員就已經好醒目地明白晒(讚)。衡量過錢、時間和舒適度，SUICA(西瓜咭)&N'EX PACKAGE係最啱用(3500YEN來回新宿<>成田,抵)。不過出發前都要自己睇一睇TIMETABLE(FROM NARITA / TO NARITA)，因為唔係每班車都去新宿/池袋，錯過一班可能要等30-60分鐘。如果未決定回程的時間，職員會俾張換票證，之後在任何JR COUNTER出番張回程飛就得啦。N'EX全車都係指定席，即係出飛的時候已經劃左位，實有位坐。而西瓜咭記得要用完裡面的金額先好退，如果唔係就要收手續費啦。

宿
今次揀左新宿做落腳點，因為越夜越精彩。落機之後仲有得食野和SHOPPING。由於日元高企，所以東橫INN的價格唔再(超)吸引，反而我用左HOTEL.COM去BOOK酒店，多左選擇又可以住近JR站。我對個網站的服務都幾滿意。事原我要BOOK頭尾兩日的酒店(第一晚上野，第四晚新宿)，因為第一次用個網站，而且要信用咭先過數，所以不停試唔同的酒店收費，最後到我真正要CONFIRM BOOKING時，懵下懵下同一晚BOOK左兩間酒店，當時我都未察覺搞錯左。

兩個星期之後，(突然醒左)發現自己BOOK錯左，唯有打去取消 BOOKING。同時又發現同一間酒店比我BOOK的時候平左百幾蚊，緊係要理論下啦。打去時都預左要搞一輪。點知HOTLINE好快有人聽，仲好 NICE咁幫我取消BOOKING，仲幫我重新用平D的價錢BOOK過，十分鐘解決晒D問題。之前條數一個月之後就會退番落CREDIT CARD。

之後唔記得為左咩事又打去HOTLINE，都係好快有人聽，又HELPFUL。超讚!不過最唔好的係海鮮價，要經常留意個「市」。

酒店 BEST WESTERN SHINJUKU ASTINA HOTEL位處新宿三丁目，係歌舞技町隔離。應該開業不久，所以設備新淨。如果用東京酒店房SIZE的標準，佢間房算OK，四呎床外，仲有張貴妃SOFA，再可以同時打開兩個行李箱係地下，而唔會阻礙出入。

晚餐
SETTLE 好行李，梳洗一下之後，再出動晚餐已經是九點半，所以預先睇好食拉麵的地方，免得天寒地凍係街蕩。三代目(助)係一間襟飛仔的拉麵店，主要有白赤黑三種(哈哈...其實係得三隻中文字我識睇)。段估完之後，決定一碗白一碗黑，仲加多隻蛋(如係糖心蛋就好啦)。買完飛搵位坐好，師傅主動收飛仔，跟住師傅對我地講左一輪野，我地一時反應唔切，師傅就明晒原來係兩個"聾的文盲"，就無再講野不過就彈番張"雞蛋"飛俾番我地。

吓!點算呀!未試過俾人彈飛喎，雞蛋買晒或者而家未係時候...係唔係要第日再黎過呀?

還好仲有兩碗拉麵，味道不錯，黑的較油但惹味，白的較清，肥肉較多，麵是中華拉麵。KO了碗麵之後，可憐被彈的飛仔依然放係枱面，突然ST想起"替玉"可能係加麵的意思，於是再示意師傅收飛，今次無被彈飛啦!仲放底左碗熱的無湯淨麵，YEAH BINGO!(自由行好玩之處莫過於此)

之後行下藥房/方便店，就打道回(酒)店啦.