20 週 - 第一次產檢

前日去左廣華做第一次產檢，心情有d緊張，因為第一次見醫生(唔知醫生NI唔NI屎呢!?)。

九點九準時去到，可能時間尚早，大堂等候的人不多。交低張醫生紙，坐底等叫名。

第一站 - 量血壓、度高磅重、驗小便。量血壓時姑娘會派埋一隻CD和小冊子，再講埋一陣間入幾號房見醫生。驗小便只係簡單地將試紙放入尿液浸一下，將試紙俾姑娘睇就可以。做完之後再等叫名。

第二站 - 抽血。今次要抽兩支，每支大約食指的SIZE，會用作測試八個項目，包括血色素、血型、ADIS、梅毒、德國麻疹、乙型肝炎、地中海貧血和"什麼猴子因"。每次會叫四位準媽媽準備，每位先派兩張印有媽媽名的貼紙，抽血的時候把貼紙交俾姑娘，姑娘會再跟媽媽核對多次個名，就開始抽血。由於我是最後一個，無聊地留意到幾位媽媽跟我一樣，都係好驚，唔敢望姑娘，死命望住右邊幅牆。希望下次唔洗再抽啦!!做完又再等叫名。

第三站 - 入房見醫生。等左廿分鐘左右，ST同我一齊入醫生房，見到一位女醫生和一位姑娘，醫生好努力咁做DATA ENTRY，反而姑娘得閒跟我講解下檢查程序。
一望就知醫生心情麻麻，不耐煩地講「IT 唔係職業黎嫁，係問你做咩POST!」「你有無出過水豆、德國麻疹?你黎度無填喎。」「媽咪有糖尿，爸爸呢?」(我望一望ST)「係你呀，佢的爸媽同你無血緣咖麻。」「你LAST M 係幾時，點解一張填10號，一張填15號?」(...)「係唔係你填咖!」(因為唔記得正確日子，喱個係大約時間....)「咁即係幾多號?」「有無交第一次超聲的結果黎?」(我交左最近一次)「無用咖，要第一次最準。」(私家醫生話而家的預產期係...)「唔得咖，係要LAST M的日子。」纏繞在這個問題上五六分鐘，我真係按捺不住跟醫生鬥悔氣，好彩有姑娘和ST係度緩和下。最後醫生無辨法之下為有填左的私家醫生紙上的預產期。真係唔知為咩咁執著，難度BB真係會果日出世?
之後姑娘叫我除褲訓上床檢查，當我準備好的時候，醫生仍然死心不惜，係度計個預產期!!姑娘唯有跟我解下檢查陰道過程...
到醫生黎檢查，用聽筒放係心口兩秒，用手按胸兩下，用力按肚一下，再用金屬工具檢查陰道。第一次檢查特別緊張，好彩姑娘在旁提醒如何放鬆，順利完成。
回到醫生枱，醫生似乎對預產期仍然心心不憤，一寫預產期一寫唸唸有詞，然後將預約覆診傭忘交俾我。老公要陪產的話，只要入院登記的時候講底，產房安排到就可以了。
而姑娘再解釋因為家人有糖尿，所以要安排我做糖水測試云云。又提醒每月第一個工作天可以上網登記產前班，我問如果上唔到點算，姑娘就話唔一定要上，就算唔上妢娩班都可以陪產。之後離開醫生房，又再等叫名。

第四站 - 預約下次覆診。在RECEPTION拎左預約覆診紙，無問題就可以走啦。

十一點四離開醫院。

之後ST和我都研究過醫生的'執著'，對件事有咩幫助呢?
要黎預床位? (唔係越後期越準確嗎!) 要黎決定係唔係'過期居留'，要唔要開刀之類? (真係唔知!)

21週 - 你係唔係有左呀?

未夠三個月，已經通知上司有喜的消息，因為有咩事要請假都方便D。而上司除左恭喜我之外，工作上亦作出左相應的安排，找多一位同事跟我手上的PROJECT，以便有個BACKUP。同事無端端多左野做，當然會問點解，所以上司'徵詢'過我講唔講得之後，我都無反對，所以公司只有幾位同PROJECT的工作伙伴知道。而幾個工作伙伴都很好，守口如瓶。

而到左21週，身體都未有太大的變化，重左六磅，肚圍三十一吋。穿上闊身衫加上秋冬的外套大褸，個肚仍然未顯眼。再加上我的部門男多女少，男同事更少留意到。

不過今日食完晏，經過PANTY跟一位兩子之母的同事閒聊，突然同事問「你係唔係有左?」「吓，係呀。」「嘩，恭喜晒，不過你都KEEP到，唔係好覺喎。」「唔覺呀!咁你點知呀?(我都覺件衫遮到喎。)」「哈哈，你忘記左我已經有兩個...哈哈」「...(咁都得?)」

跟住同事就開心地跟我分享她的經驗，細聲講大聲笑就容易吸引其他人。男的經過當然唔好意思停留，而女的聽一兩句就知咩事啦，就係咁幾位媽媽同事都紛紛恭喜我。

等我仲諗住可以遲多一兩個月俾個BIG BIG SUPRISE我親愛的同事添!! HEHE....

20 週 - 2012 四月媽媽會

上星期六在一間樓上CAFE跟一班同是(預產期)四月媽媽茶聚。本來素未謀面，不過一談到肚裡的龍仔龍女，似乎大家都十分雀躍，吱吱喳喳的。三個女人一個墟，廿幾三十位準媽媽，可以想像個墟幾「壯觀」。難委一起來的準爸爸，有的窩在SOFA睡著了、有的圍在準媽媽埋裡"有口難言"、比較幸福的應該是一班帶子雄郎，至少有伴麻。

至於ST就醒目地跟我說「玩得開心D」樂得在家打機消磨。而全場最活躍的是一班準小哥哥小姐姐了，滿場飛，爸爸就跟在後頭護架。

這個聚會沒有安排什麼特定的活動，旨在提供一個地方，食下傾下，認識一下其他準媽媽。轉眼就三個小時，最後影番張大合照，完的時候反而唔捨唔走添。

期待下個月的聚會，已經有人心思思約緊啦!!

19 週 - 攻入一田

今次以BB之名出戰一田，事前做左兩輪實地考察(未試過咁認真)，最後ST和我上星期日攻入一田，目標鎖定為
- v - COMBI HIGH CHAIR，Model:Roanju LY (慳左$500)


- x - BB床 (最終都是心大心細，決定唔到床仔的SIZE，還是咨詢下靚媽們的意見先再買)

- x - PETER RABBIT BB床上用品SET (賣晒! >.< 而好彩的是永安減價再平$80，$634)

- v - PAUL FRANK 的床單被袋 (入伙時捨不得買，一直記掛到而家，即係好鐘意，唔係一時衝動啦!!)

- v - B DUCK 大錢箱 (原價四百幾，今次減價折實28x，o依...交換左一個眼神，俾錢)

- v - EPICUREAN CUTTING BOARD (上次減價買大送細，好友大廚想買，不過佢的財政又未批喎，所以ST和我就買黎送俾大廚做生日禮物，而實情係我地周不時都會去大廚家開餐。佢煮得開心，自然食物都好味D啦，計落有SO呀。而ST見到大廚用，又心思思，每次經過COUNTER又要去睇下。經ST一年的"巡查"後，發現細SIZE(8"x6")得一田有售。留意左咁耐，即又係好鐘意啦!! 而直至目前，我用得多，用來切完生果直接上椅枱，快靚正!)

- v - HABA護膚品 (每次減價，又點少得補貨啦!)

雖然以BB之名，回顧所有戰利品，似乎是滿足ST和我的一己私慾多D!! HEHEHE...
BB下次減價再和你去過下... HOHOHO...