從來無諗過會幫人剪頭髮。。。不過為左BB，咩都夠膽死。
一出世吉吉仔已經有多頭髮，又軟又貼服，仲有堂得髓，好鬼靚仔。
點知滿月之後，頭髮越來越長，又豎起晒，成個癲佬咁。
終於忍唔住拎起交剪修下D「亂草」，第一次幫BB剪頭髮，都幾手騰腳震，又驚剪到BB，又驚剪到一窟窟。不知從那裡開始。
最終ST抱住餵奶，我就左手夾起一撮一撮頭髮，右手就直剪落去，修呀修呀。。。先剪兩邊，再在頭頂求其剪呀剪。剪完抱直一睇又OK喎，短了又整齊了，還多了點剛陽氣添。
前
後
之後吉吉仔開始脫胎毛，原本濃密的頭髮，變得有點稀疏，三個月大還出現M字額，成個伯父咁!! @.@
所以又再剪頭髮，今次信心滿滿，我還可以自己一個人操刀，將BB抱著坐在胸前，就已經可以剪，又係見髮就執起剪，主要頭頂的位置。
七、八下就剪完，以為唔覺眼，怎知嫲嫲一眼就望出問「剪左頭髮呀」(好眼利啊!)
前
後
原來剪頭髮都唔係咁難，尤其是BB未識投訴，任我剪，呵呵呵呵。。。
回歸工作一月，我的奶媽時間表如下:
** 為了遷就工作時間，每朝五點九，就要爬起身泵第一次奶;
** 午飯時，遲半小時吃飯泵第二次奶;
** 放工去到老爺奶奶家吃晚飯前泵第三次奶;
** 半夜臨睡泵第四次奶。
日復日，奶量尚算可以維持。不過有很多因素，不停誘使我放棄。最難過的原來不是晨早爬起來，反而是要撐到半夜，每晚十一點，安頓BB上床的同時，睡魔已經急CALL，有時會不自覺地跟BB一起睡著，再醒來時多數已經半夜三點。如果無醒，直接睡到天明，就會是整整十一二個小時無泵奶，乳線好容易會窒。不過要是三點醒來，四點再上床，六點再起身番工，其實更加睡眠不足。試過將每天四次改為三次，將放工那次推遲到回家之後，雖然解決了挨眼訓的問題，不過每次食完晚飯就趕著走，好似唔係咁好。而且有時遇著老爺奶奶招呼親朋戚友食飯，更加難控制回家時間。
身為奶媽的另一個問題是困身。從前放工可以去做指甲、FACIAL、行下街才回家，現在連買一些必須品都要想過計過，時間許可嗎，因要趕著回家。甚至週末出街行下，都要諗下點樣泵奶或者要趕回家「開工」，全日的活動更無可免則免。
原來奶媽都有職業病，就是手婉痛，都怪太用力的關係。
每星期，每個月都會想，就此金盤洗泵吧!! 但是回想自己又不是無能力，尚且可以供應全人奶，就此掛泵有點可惜，所以一次又一次繼續撐下去。
NEXT CHECK POINT，四個月，加油!!
