檔案編號#10 黑丸王

事件一:

時間: 下午四時十二分

地點: 元朗大棠路與大馬路交界 

星期日本來諗住係勢力範圍內行行企企過下日神就算啦. 突然聖旨到, 要跟隨阿媽出去做正經野. 難得假日咁就賴瀟洒, 拎起腰包就起行。

究竟邊個話元朗係窮鄉僻壤. 假日時大馬路擠得水洩不通. 就在這時候塞得動也動不了的情況下, (我估計) 我的7370就從腰包內給人擄走了 >.<

事件二:

時間: 晚上七時三十八分

地點: 灣仔會議道的九巴104上

星期一放工, 約左人係旺角傾野. 因為傾正經野, 唔想遲到, 所以七點半匆匆離開公司. 諗住成個鍾由灣仔去旺角, 搭車搭船搭地鐵點都會去到啦。

經過巴士站仲諗緊好唔好行遠d搭地鐵, 就見到巴士係度等緊我. 仲要有位坐... '即上'。

路面情況有點擠塞. 不過正常的, (我安慰自己)根據經驗都會準時塞到去的. 就係呢個時候灣仔泳池旁會議道上的轉彎位, 一架巴士跟一架貨車'痴'埋一齊. Oh god,  當時佢地距離我5 m. 完完全全塞住左. 等.... (五分鐘)有人打去999問幾時有警察到..... 又等....(二十分鐘)有人再打999問警察係唔係只識得抄牌, 家而人影都無....(刪去一千字).... 又又再等.... (二十五分鐘) 啊..點呀..我無手機用呀.....又又又再再等等....  (四十分鍾)我決定已後我左約人的話, 我都要搭地鐵...... (五十二分鐘)...... 巴士終於慢慢駛向紅隧口。