六個月大啦!!

突然驚覺吉吉不再是一舊飯，一舊可愛的飯。

上餐館，會手多多，抓餐牌扒刀叉。

放在面前的蛋糕會用手去抓，又會撲前去'食'蛋糕。

坐上手推車，不再安份地靠著坐了，會向前挨(咬)著前面的手把，再幾日後就已經會挻直身子，自己坐著，之後就算「高速行駛」吉吉都會張開雙手來學習平行、坐穩。

吉吉開始會提出食以外的要求，要求要抱不要躺下來，要求要人陪玩不要獨個兒玩。有時放工返到屋企，吉吉會停低手上的玩具，開始會眼神追蹤我，要我抱。如果我無俾反應，就會低嗚。

吉吉由初時東歪西倒地坐，到後來可以坐穩一陣，不過會突然好似熄大掣咁向後跌，所以我們總要嚴陣以待地守在身邊。有次去朋友家，見到吉吉在一堆「大」小朋友中，可以自己安安靜靜地在玩具堆中坐著玩，一樣一樣拎起又放下或者放入口(唉…吉吉，你放入口的玩具仲有人敢玩咩?!)。那一刻驚覺吉吉又長大了。

坐得起之餘，還開始可以只捉住吉吉的手腕，就會搖搖擺擺地企起身。

除了奶，開始試食米糊、粥糊，還有其他瓜菜、生果。吉吉在食方面都有D要求，喜歡的會追住食(最鐘意南瓜和布冧)，唔啱口味的兩啖就拒絕再張口(最唔想食的是蛋黃)。稀D稠D都會影響食野的心情。有次一連幾日食了波菜蓉，之後就排了三日波菜便便，真的嚇了一嚇。

有時看見我們在吃麵包/零食的時候，吉吉會先會眼定定望著，好似在確定你在食野嗎?確定之後，就會擺出很想食的樣子。 (…為食的吉吉…”>o<” ) 

六個月有兩支針要打, 一支在私家打六合一，當晚吉吉的體溫急升，有了上次的經驗，ST和我好快就決定要餵退燒葯。之後體溫受控，慢慢退燒了。之後一個星期返健康院檢查和打肝炎針，無發燒。吉吉人生第一次的測驗順利過關，拎玩具玩果PART，仲要揀自已衫仔釣住的公仔黎拎，唔要姑娘俾果件玩具，仲俾姑娘笑「有要求喎，要揀自己果件，算你啦。」一齊正常，九個月唔洗返健康院啦!!