我要做奶媽 (上)

從懷孕開始，在餵奶粉定人奶的問題上，我一直是抱試試下的心態，試下人奶啦!唔得的話就食奶粉(其實沒有認真諗過唔得會點，因為我只想盡力去做)。所以當BB來到我身邊開始，我就努力地學習做「奶媽」。

記得第一次餵母乳，咩都唔識，一齊只有聽從護士的指示。見到BB個嘴脤卜卜，郁下郁下，都幾得意。護士都讚BB啜得好叻，亦好肯啜。之後每隔一兩個鐘就餵一次，BB喊就餵。有時深夜時份，緊在太倦，抱著BB，一邊餵一邊樁眼瞓。有時BB食食下睡著了，又要用盡方法來搞醒BB，終於醒了，啜兩下又瞓過，真是無可奈何。但是無論如何，都守住一個大原則，每次只會餵30-40分鐘。

餵多幾次之後，乳頭開始痛，一有機會就問醫院/健康院的護士，睇下我和BB的姿勢有無問題，點解會損。不段嘗試和修正餵奶姿勢，直至後來護士都覺得姿勢正確，唯獨BB的下顎比上顎生得比較入，雖然咀仔已經張大了，下顎仍然咬住乳雲，傷口還是越來越痛，每逢餵奶就只想起吸啜時的痛楚。

兩個星期之後，右邊的傷口實在太嚴重，所以只好埋身餵左邊，右邊就泵出來(但是要洗奶樽用具，又要做多樣野)。休息了幾日，傷口癒合，就再試。但是BB實在太用力了，只是食了一次，又再開始痛番。最後決定放棄埋身餵，改為全泵。

跟住的問題是奶量，眼不見為淨，現在眼見，每餐俾幾多BB食，有幾對眼睇實，因此開始要「跑數」了。每次泵奶都需要一個鐘以上去磨，其實有少少沮喪。加上親朋戚友之間一些無心說話
「(驚訝地)咁耐得咁多，以為你入房瞓左添!」
「(賴風趣地)你個仔好似唔飽喎，唔好咁孤寒啦!!」
，又或者見BB喊就一定問「(關懷地)食左奶未呀!~~剛剛食完。幾時要食呀?~~個幾鐘後。佢好似想食奶喎!~~其實佢扭眼瞓。」。
不知不覺間有些無形的壓力，再加上睡眠不足，不自覺地開始遷怒其他的人，有時又因小事而喊。

好彩有ST的體諒和靚媽的幫忙(煲埋上奶湯我飲)，雖未算富媽媽，但尚算進步中，應付到BB一日的奶量，而且有一兩餐的儲備。

挨過滿月，由MEDELA SWING電泵換了AVENT手泵，泵奶的情況改善了，時間慢慢縮短至半小時。而奶量亦同時跟著BB食量増加，仍然只有幾餐奶的儲備。BB增重理想，以經好滿足了。

除了奶量，時間又是一個嚴峻的問題。尤其放產假期間，只有我跟BB在家，換片食奶掃風換片安撫BB氹佢訓，每個CYCLE兩個幾三個鍾，中間還要做簡單的家務、準備自己的午飯。每次泵到一半時，BB總會醒來要食或者驚醒要安撫。又或者夠鐘泵奶，BB就扭抱要瞓，一搞就一兩個鐘。(擔心泵疏了，奶量會跌。)
BB完全掌控了時間。這種失控，纏繞了我好一陣子，直至調慢了自己的步伐，每日只做一兩樣家務，其他的就由它明天再做，午飯早一兩個鐘準備。這樣做其實沒有解決真正的問題，只是調整自己的態度，令自己放鬆D，順其自然。有時幸運的話，下午還可以跟BB一起小睡片刻。

兩個半月的產假轉眼就完結了，返工之後要繼續泵奶嗎?我只會話「我會嘗試去做。」

(待續)