HONEYMOON LONDON & PARIS TRIP - DAY 4

COSTWOLD - WOODSTOCK - OXFORD {HOTEL: Pembroke Guest House}

7 JUN 2011 雨 - 天晴

WOODSTOCK
食完早餐，八點開車離開COTSWOLD，朝OXFORD方向走。朝早我們選了中間一個的景點BLENHEIM PALACE(布萊尼姆宮)參觀(初時睇名以為係皇宮，參觀完先知其中一個賣點是SIR WINSTON CHURCHILL的出生地)。沿住外圍高高的圍牆搵入口，最後駛左去一個疑似後門的地方，得一個更停。正想調頭之際，見前面有人落車似去問路，就跟住落車去八下，原來都可駛入去。入左圍牆內，第一個印象是「嘩!地方咁大嘅」，由圍牆入口直路行去門口我諗都要行10-15分鍾，真係大得離譜。

 

整個景點分開大宅內部和兩個花園部份，首先我們在大宅的右冀(STATE ROOMS)跟隨講解員參觀。有人講解真係唔同D，講下喱幅畫的由來，跟隔離房果幅的聯繫、那件擺設的歷史，轉眼就睇左45分鐘。

外面剛好停雨，就到花園走走。搵左個好位置，差不多是獨霸一個大花園的情況下，優閒地KO份自備午餐，真是爽!

 之後我們開始在花園散步，花園有三條散步徑，我們選了其中一條THE LAKE AND CASCADES會經過玫瑰園和湖邊的(根據介紹走一圈要45分鐘)。這個時候天氣開始放晴，周圍環境真係好舒服。

 

因為朝早的導賞實在太正，所以由花園再走入大宅，想參觀餘下的左冀(THE UNTOLD STORY)。左冀的展覽風格很不同，加入了大量機械、現代科技、模擬場景，去展現大宅經歷的不同年代的人民生活。而我的個人感覺係悶和焗，因為全部場景自動化的關係，水流作業，二三十人迫係一間細房，有時我根本什麼也看不見(只怪我生得矮 >.< )。最後沒有看完，就搵機會徹退。

下午三點，還有另一邊的花園部份(THE PLEASURE GARDENS)未參觀，但是已經是時候離開。離OXFORD還有30分鐘車程。

OXFORD
點對點之間，利用GPS搵路，其實相當方便。反而去到目的地的時候，搵入口、停車位就要花上一點功夫。到了OXFORD市中心，人多，燈位多，踩單車的人仲多，要慢無目的搵停車場，真的有點手忙腳亂。如果事前大略知道邊條街有停車場，用停車場黎定位會比用景點好(景點前根本無地方停車)，尤其在OXFOARD這類小市鎮上。

在OXFOARD我們收起旅遊書，隨心遊蕩，見到有趣的建築物街景就將它拍下，但是賴理它的名堂與歷史。不過比起死物，我覺得踩住單車的人更有趣味。無論穿著西裝套裙或短褲便服，他/她們都好似飛馳中的車手，有型有款。

六點幾又下起雨來，就躲到BUGER KING食晚餐。食完雨就停了，不過街上的人明顯少了，鋪頭都陸續關門。只好去超市打個轉，補給食物生果，就打道回(旅)館。

今晚選了間離市中心的10分鐘車程的民宿。我們住在閣樓(三樓)有獨立廁所。屋主人很NICE，放好行李後就帶我們參觀廚房、飯廳和花園，簡直係DREAM HOUSE呀!廚房可以隨意用，如果有一班朋友圍埋食野就超正呢。

 

 

玩左四日，我終於支持唔住，是夜未夠十點就上床訓啦!

P.S.架車實在大了點，又或者OXFORD的停車位小了點，ST先刷花了左邊車門，換個仁停車位之後又刷花了右邊，...好彩我們買左全保炸。