30週 - 薑醋工程三

刮好薑，灘開將薑的表面風乾一二日(如果未開始煲的話，就要先收入雪櫃，煲之前一晚先再灘開吹一吹)，就可以開始煲。今次我請左阿妹的奶奶來擔當顧問，有顧問在場整個過程相當順利。

首先將薑切開二邊，再拍鬆(唔係拍散)。

跟住在鑊面用廚房紙抺少少油，就可以開始烘乾，直至薑乾身為止。要分辨乾未，只要抄一抄D薑，聽下仲有無(燒乾水的)聲就得啦。
另一邊爐用小火開始煮醋(唔好滾起)，薑烘乾後就直接放入醋度。留意醋的份量，要蓋過薑。

最後烘乾所有薑後，就可以大火煮醋啦。滾起之後再煮十五分鐘，熄火，打開蓋就得左(開蓋係唔想有倒汗水)!

之後每星期再拎出黎，(如有需要)加入新的甜醋直至蓋過D薑，用中火滾起(因為煲大，要滾起都差不多一個鍾)，滾起之後一兩分鐘就可以熄火。如是者，四五次之後，如果天氣乾爽的話，可以隔二十日先再煲。