30週 - 有得食好食啦

自從有BB之後，有很多「好野」都無我份，海鮮呀、18個月風乾火腿呀、芝士呀。。。我已經無介牛肉、雪糕、生冷野之類，不過都唔敢放肆，每次都只係一啖起兩啖止，盡量避，所以跟ST出街食好野的意慾大大減低。

踏入30週，開始要清胎毒，以我的演繹即係咩都食得!! 好，就去食D好野慶祝下先。所以約ST去盛八食飯(好似以前拍拖時候咁呀，係要約嫁，難得大家唔洗OT)，嘩...真係好好味，久違了A4霜降牛、A5牛肩肉、燒蠔、燒帶子，真係好正呀。

當滿足完口福之樂之後，突然感慨地對ST講「有得食好啦，BB出左世之後，好難話出街食飯就出街，一放工就要番屋企做奴隸獸。」尤其記起幾日前跟兩歲的甥生飲茶的情況，優雅地外出用膳，根本係唔可能嘅事，除非留底甥生仔係屋企。而ST居然話「留佢係爺爺屋企過夜，咁我地米可以偷偷地出黎囉。好彩我地都可以放低BB唧。」哈哈...無錯BB，係BB你未出世之前，你的爸爸媽媽已經密謀，到你一歲的時候留底你係香港，自己去旅行。仲有已經達成共識未到小學之前，爸爸媽媽係唔會帶BB你坐飛機嫁。哈哈...(希望到時我真係咁狠心啦)