37週 - 預演

星期一如常搭村巴返工，上車訓到落車，就快落車之際，肚的上方，胸口對落，橫隔膜的位置，突然劇痛。
免強落車行番公司，短短7、8分鐘的路程，都要停下來o抖兩次。雖然好痛，不過心知唔係作動，已經痛左45分鐘無停過，痛的位置似乎唔應該係橫隔膜位置。
之後去左一廁所，又好似想嘔，心諗「唔係掛，今次我無亂食野呀!!」但是又真係好痛喎，點算?

打俾ST，居然無人聽，WHAT'S APP 佢又無反應，好明顯個人同部電話「分開左啦」。跟住就打俾靚媽護士問下「專業」意見，靚媽提議我入院CHECK下，一來已經足月而且驚我係腸胃炎之類。無辦法啦，跟老細講低聲，就CALL的入院。

臨落車仲要俾司機煩「你張五百蚊唔早出聲，我出隧道時找散佢o麻。」我心諗你唔係咁唔識趣「一個大肚婆CALL的去醫院，加一個痛樣。會有心情係上的士前預備好散紙，驚你無得找o麻?!」真係應佢都費事，找完大紙仲要話「差一蚊。」當佢想搵一蚊找的時候，我心諗「唉~~得啦，豪俾你啦」。

入到急症室用身份試登記，探熱，再俾人接上產房，都幾快喎。

係產房登記室，先作簡單的檢查，姑娘按下個肚，再問下痛的情況，
就話「緊係痛啦，阿B申到咁直，隻腳頂住你個胃。...」喎!原來係咁，咁可以點呀?
「檢查下啦」就俾左套衫我換。

入到產房的病房，對面兩位媽媽雖然個樣好似好痛，不過嗅住笑氣都尚算冷靜。反而旁邊的媽媽，一邊嗅一邊喊，有時又大叫，姑娘都正面地開解一下「喊是無幫助，只會令你鼻窒，嘔就更加辛苦」「而家用晒D力黎叫，陣間就無力生啦」，又糾正佢聞氣的節奏，還鼓勵地說「做得好好，你做到啦」。不過這位媽媽最後似乎都係放棄了，還是繼續一邊聞氣，一邊喊和叫。還有點不負責地哭說「我唔知自己做緊咩呀!!」

ANYWAY，相映之下，我的痛似是雞毛蒜皮，有D過意唔去，好似浪費了資源。

經過一輪檢查、抽血、聽BB心跳之後，似乎一齊正常，只係我個"胃"仍然好痛，挨到午飯時間姑娘話有胃藥食，點知見習醫生寫錯左，要等見習醫生開完會返黎改番先可以俾藥我。再環顧其他媽媽的痛，我只好繼續等，還幸我可以落床出大堂，有ST倍下我(佢終於知道我入院，請假過黎倍我)。到左兩點，突然個"胃"唔再痛，唔通BB申展完?!

初時以為我被診斷為胃痛之後，而我個胃唔再痛就可以出院啦，點知等完抽血報告，再等醫生巡房，再等到決定轉去產前房，我要留院觀察一晚。

當轉到去產前房的時候，我就明白媽媽們之間所說的天堂，相比之下產房得確係天堂(除了有時旁邊會出現失控的媽媽外)。好想返屋企呀!

第二朝醫生巡房話可以出院，之後我就好似小學生一樣斷追問姑娘幾點走得。還要麻煩老爺奶奶來"湊"出院添。真係有D唔好意思。

歸納今次的經驗，ST和我都有了多些準備，
* ST開始要電話跟身，唔可以放低電話去開會。
* 我的電話要每晚叉電，因為產房無得叉電，產前產後房都只是偷雞叉電。
* 如果ST和我前後腳到醫院，ST可能要係產房外面等一段時間，因為除了探病時間外，姑娘好少理外面按鍾的爸爸，所以外面等緊的爸爸要俾D耐性呀。
* 到時我在產房時要面對的痛，希望自己唔會咁失禮，又喊又叫，最緊要冷靜。
* 突然入院，ST要幫我準備的用品。今次ST完全肥佬，返到屋企只係執左對拖鞋和底底俾我，其他牙膏牙刷之類就一樣都無啦。只會問我要D咩?一個唔舒服的大肚婆又點會有心情，遂樣遂樣講呢!
當然我都體會到佢都好衝忙和緊張。所以我地之後寫好份CHECKLIST要執什麼用品。
* 探病要自備口罩。
* 出院要家人接，唔俾自己出院。