39週 - 產假的第一天

最近不停被問及幾時生得?其實我都好想知 >。< (BB不如你自己出黎番喱個問題啦!!)

產假的第一個行程是去廣華第七次產檢。10:15去到,已經有爸爸企左起身(留位俾其他大肚媽媽坐),所以ST都一樣企係度倍我,仲要幫我潑埋扇(黎個5星服務做多個幾星期就無嘅啦!)

等左成個鐘先埋去血壓站量血壓,仲諗住無十二點唔走得。但是出奇地等多10鐘就可以見醫生。照例上床聽心跳,姑娘話「唔好緊張。」我心諗「我齋訓係度無野好緊張呀!」再望一望,原來唔係話我,係對個位著住蘋果色制服,拎住聽心跳機的學護講。睇黎今日係實習日，俾心機呀,學護姐姐! ^^

醫生話BB 42週出世都係正常,所以要係下星期產檢(40週)先約催生期。而BB今日已經落左一半，阿Q的我和ST都已經好興奮，已經一半啦，BB加油呀。

產檢完畢，食埋午餐。就開始我產假其中一個最重要的活動
– 行街(呵呵)。醫生話要行多D，同埋行下希望(豬)腳快D消腫，所以就算ST幾想趕我返屋企休息 (怕我一個人出街有事)，都無辦法要俾我去，不過就要電話報告行蹤。